काश्मीरमधून परतलेल्यांनी सोडला सुटकेचा नि:श्वास; 183 पर्यटकांनी मोफत विमानाच्या व्यवस्थेमुळे मानले आभार

पुणे: काश्मीरमधून मुंबई विमानतळावर पोहचलो. खूपच बरे वाटले. काश्मीरमध्ये भीतीच्या वातावरणात आम्ही अडकून पडलो होतो. कधी एकदा पुण्यात येतो, असे झाले होते. मुंबई विमानतळावर पोहचल्यावर आम्ही सुटकेचा नि:श्वास सोडला. शासनाने आमच्यासाठी केलेली ही व्यवस्था खूपच चांगली होती. शासनाचे खूप खूप आभार, असे सांगत होत्या काश्मीरमध्ये अडकलेल्या पुण्यातील पर्यटक ज्योती झुरुंगे म्हणाल्या.

काश्मीरमध्ये अडकलेल्या पर्यटकांना परत आणण्यासाठी शासनाकडून विशेष विमानांची व्यवस्था करण्यात आली होती. या विशेष विमानाने तब्बल 183 पर्यटक प्रवासी गुरुवारी सायंकाळी सातच्या सुमारास मुंबई विमानतळावर उतरले. या वेळी दै. ‘पुढारी’च्या वतीने त्यांच्याशी संवाद साधण्यात आला.

त्यावेळी त्यांना तेथे आलेल्या समस्यांची माहिती घेण्यात आली. यासोबतच विशेष विमानसेवेमध्ये त्यांना काय, काय सुविधा उपलब्ध करून देण्यात आल्या, याचीही माहिती घेण्यात आली. या वेळी सरकारने मोफत विमानसेवा उपलब्ध करून दिल्यामुळे पर्यटकांनी शासनाचे आणि मंत्र्यांचे आभार मानले.

ज्योती झुरुंगे म्हणाल्या, माझ्यासह आमचा 70 जणांचा ग्रुप गुरुवारी दुपारी साडेतीनच्या सुमारास श्रीनगरहून विशेष विमानात बसला अन् मुंबई विमानतळावर सायंकाळी साडेसहाच्या सुमारास उतरलो. प्रवासादरम्यान शासनाकडून आमची चहा, नाष्टा यांसह अन्य सर्व सुविधा देण्यात आल्या. येताना आम्हाला कोणताही त्रास झाला नाही. शासनाचे खूप खूप आभार.