Parth Pawar Engagement: पवार कुटुंबात पुन्हा एकदा आनंदाचे वातावरण आहे. राष्ट्रवादी काँग्रेसचे नेते आणि उपमुख्यमंत्री अजित पवार यांचे सुपुत्र पार्थ पवार यांचा 29 जुलै रोजी कायनात धार यांच्यासोबत साखरपुडा होणार असल्याची माहिती समोर आली आहे. खासदार सुप्रिया सुळे यांची कन्या रेवती सुळे यांच्या विवाहसोहळ्यानंतर पवार कुटुंबात आणखी एका शुभकार्याची तयारी सुरू झाली आहे.
गेल्या काही महिन्यांपासून पार्थ पवार आणि कायनात धार यांच्या नात्याबाबत राजकीय तसेच सामाजिक वर्तुळात चर्चा सुरू होती. रेवती सुळे यांच्या विवाहसोहळ्यात दोघे एकत्र दिसल्यानंतर या चर्चांना अधिक उधाण आले होते. आता साखरपुड्याची तारीख निश्चित झाल्याने या चर्चांवर शिक्कामोर्तब झाले आहे.
कायनात धार या मूळच्या हरियाणातील असून सध्या त्या दिल्लीत वास्तव्यास आहेत. गेल्या काही महिन्यांत त्या पार्थ पवार यांच्यासोबत विविध सार्वजनिक आणि कौटुंबिक कार्यक्रमांमध्ये दिसल्या आहेत. त्यामुळे त्या सातत्याने चर्चेत राहिल्या.
काही महिन्यांपूर्वी पार्थ पवार आणि कायनात धार यांनी मध्य प्रदेशातील प्रसिद्ध महाकालेश्वर मंदिरात एकत्र दर्शन घेतले होते. त्यावेळचे फोटो सोशल मीडियावर मोठ्या प्रमाणात व्हायरल झाले होते.
कायनात धार या केवळ आनंदाच्या प्रसंगीच नव्हे, तर पवार कुटुंबाच्या महत्त्वाच्या कौटुंबिक कार्यक्रमांमध्येही सातत्याने उपस्थित राहिल्या आहेत. त्यामुळे त्यांचे कुटुंबाशी जिव्हाळ्याचे संबंध आहेत.
रेवती सुळे यांच्या विवाहसोहळ्यातही त्या उपमुख्यमंत्री सुनेत्रा पवार आणि पार्थ पवार यांच्यासोबत उपस्थित होत्या. त्यानंतर त्यांच्याविषयीच्या चर्चांना अधिक वेग आला.
दरम्यान, रेवती सुळे आणि उद्योगपती सारंग लखानी यांच्या विवाहसोहळ्याला राजकारण, उद्योग आणि मनोरंजन क्षेत्रातील अनेक दिग्गजांनी उपस्थिती लावली होती. ज्येष्ठ नेते शरद पवार, ओमर अब्दुल्ला, कन्निमोळी, जयंत पाटील, जितेंद्र आव्हाड, रोहित पवार यांच्यासह अनेक राजकीय नेते या सोहळ्यात सहभागी झाले होते.
याशिवाय बॉलिवूडमधील शाहरुख खान, अमिताभ बच्चन, तसेच उद्योगपती मुकेश अंबानी, अनिल अंबानी आणि गौतम अदानी यांच्यासह अनेक मान्यवरांनीही विवाहसोहळ्याला हजेरी लावली होती.
रेवती सुळे यांच्या विवाहानंतर आता पवार कुटुंबात आणखी एका शुभकार्याची तयारी सुरू झाली आहे. 29 जुलै रोजी पार्थ पवार आणि कायनात धार यांचा साखरपुडा पार पडणार असून, त्यानिमित्ताने पवार कुटुंबात पुन्हा एकदा आनंदाचे वातावरण निर्माण झाले आहे. राजकीय वर्तुळासह त्यांच्या समर्थकांमध्येही या सोहळ्याबाबत उत्सुकता पाहायला मिळत आहे.