खानिवडे :पालघर लोकसभा मतदारसंघाचे खासदार डॉ. हेमंत विष्णू सवरा यांच्या इनोव्हा गाडीला 1 मे रोजी सकाळी मुंबई-दिल्ली महामार्गावरील घोडबंदर जवळ भीषण अपघात झाला. मिळालेल्या माहितीनुसार, पालघर येथील महाराष्ट्र दिनाच्या कार्यक्रमाला जाण्यासाठी ते मुंबईहुन जात असताना समोरून येणाऱ्या डम्परने त्यांच्या गाडीला जोरदार धडक दिली.
राष्ट्रीय महामार्गावरील या अपघातात गाडीचे मोठ्या प्रमाणात नुकसान झाले असून एअरबॅग्स उघडल्यामुळे मोठा अनर्थ टळला. सुदैवाने खासदार डॉ. सावरा व त्यांच्या गाडीतील इतरांना कोणतीही गंभीर दुखापत झाली नाही.
स्वतः खासदार, अंगरक्षक, चालक व सहकारी सारे सुखरूप असल्याचे खासदार कार्यालयातून सांगण्यात आले असून हितचिंतकांनी कोणत्याही अफवेवर विश्वास ठेवू नये असे आवाहन करण्यात आले आहे.
अपघातानंतर परिसरात काही काळ वाहतूक कोंडी निर्माण झाली होती. घटनेची माहिती मिळताच स्थानिक प्रशासन व पोलीस घटनास्थळी दाखल झाले आणि परिस्थिती नियंत्रणात आणली.