बोईसर : पालघर जिल्ह्यात वाढते औद्योगिकीकरण आणि मोठ्या पायाभूत सुविधा प्रकल्पांमुळे विकासाला गती मिळत असताना बोईसर परिसरातील समुद्रकिनाऱ्यांच्या भवितव्याचा प्रश्नही ऐरणीवर आला आहे. वाढवण बंदर, जिंदाल जेट्टी आणि अन्य प्रस्तावित प्रकल्पांच्या पार्श्वभूमीवर आलेवाडी आणि नांदगावसारख्या समुद्रकिनाऱ्यांचे नैसर्गिक सौंदर्य टिकवून त्यांचा पर्यटनाच्या दृष्टीने विकास करावा, अशी मागणी नागरिकांकडून करण्यात येत आहे.
पालघर जिल्ह्याची ओळख औद्योगिक वसाहतींबरोबरच सुंदर समुद्रकिनारे, निसर्गसंपदा, मासेमारी व्यवसाय आणि स्थानिक संस्कृती अशीही आहे. मुंबई आणि ठाणे परिसराच्या जवळ असल्याने येथील समुद्रकिनारे पर्यटकांसाठी आकर्षण ठरू शकतात. मात्र, वाढत्या औद्योगिक आणि पायाभूत सुविधा प्रकल्पांच्या काळात या नैसर्गिक संपत्तीचे संरक्षण कसे केले जाणार, याकडे लक्ष देण्याची गरज आहे.
वाढवण बंदरासारख्या महत्त्वाकांक्षी प्रकल्पामुळे पालघर जिल्ह्याला राष्ट्रीय आणि आंतरराष्ट्रीय स्तरावर महत्त्व प्राप्त होण्याची शक्यता आहे. त्याचबरोबर जिंदाल जेट्टी, मुंबई-अहमदाबाद बुलेट ट्रेन आणि अन्य पायाभूत सुविधा प्रकल्पांमुळे परिसरातील आर्थिक आणि वाहतूक व्यवस्थेत बदल होण्याची अपेक्षा आहे. या विकासाचा फायदा स्थानिक नागरिकांना मिळावा, अशी अपेक्षा व्यक्त होत आहे. मात्र, विकासाच्या प्रक्रियेत पर्यावरणाचे संरक्षण, मच्छीमारांच्या उपजीविकेचे जतन आणि किनारपट्टीचे नैसर्गिक स्वरूप टिकवणेही तितकेच महत्त्वाचे आहे. त्यामुळे मोठ्या प्रकल्पांच्या नियोजनासोबतच समुद्रकिनाऱ्यांच्या संवर्धनासाठीही ठोस उपाययोजना करण्याची गरज आहे.
बोईसरजवळील आलेवाडी आणि नांदगाव समुद्रकिनाऱ्यांवर पर्यटनाच्या दृष्टीने विकासाच्या संधी आहेत. या ठिकाणी स्वच्छता, पिण्याचे पाणी, स्वच्छतागृहे, वाहनतळ, दिशादर्शक फलक आणि सुरक्षिततेसाठी आवश्यक सुविधा उपलब्ध करून दिल्यास पर्यटकांची संख्या वाढण्यास मदत होऊ शकते. पर्यटनाला चालना मिळाल्यास स्थानिक तरुणांना रोजगार, महिला बचत गटांना व्यवसाय आणि खाद्यपदार्थांना बाजारपेठ मिळू शकते. त्यामुळे या समुद्रकिनाऱ्यांचा नियोजनबद्ध विकास करून स्थानिकांना आर्थिकदृष्ट्या सक्षम करावे, अशी मागणी नागरिकांकडून करण्यात येत आहे.
पालघर जिल्ह्यात उद्योग आणि पायाभूत सुविधा प्रकल्पांचा विस्तार होत असताना नैसर्गिक संपत्तीचे जतन करणेही महत्त्वाचे आहे. आलेवाडी आणि नांदगाव समुद्रकिनाऱ्यांचा नियोजनातून विकास केल्यास पर्यटनासोबत रोजगाराच्या संधी वाढू शकतात. त्यामुळे समुद्रकिनाऱ्यांचे नैसर्गिक सौंदर्य हरवू नये आणि पर्यटनाचा लाभ मिळावा, यासाठी प्रशासनाने ठोस पावले उचलण्याची गरज आहे.
विश्वासात घेवून विकास आराखडा करावा
समुद्रकिनारे हे केवळ पर्यटनाची ठिकाणे नसून मच्छीमारांच्या उपजीविकेचा आधार आहेत. त्यामुळे पर्यटन विकास करताना अनियंत्रित बांधकामे, कचरा आणि सांडपाण्यामुळे पर्यावरणाचे नुकसान होणार नाही, याची काळजी घेणे आवश्यक आहे. किनारपट्टीसंबंधीचे नियम पाळून स्थानिक नागरिक आणि मच्छीमारांना विश्वासात घेऊन विकास आराखडा तयार करावा, अशी अपेक्षा व्यक्त होत आहे. आलेवाडी आणि नांदगाव समुद्रकिनाऱ्यांच्या विकासासाठी प्रशासनाने पुढाकार घेऊन उपलब्ध सुविधांचा आढावा घ्यावा. पर्यटन विकासासाठी निधी, आवश्यक सोयीसुविधा आणि पर्यावरण संवर्धनाबाबत स्पष्ट नियोजन करावे, अशी मागणी नागरिकांकडून होत आहे.