बोईसर ः बोईसरजवळील महागाव परिसरात अंतर्गत वादातून झालेल्या गोळीबारात सुरेश वरखंडे (52) हे गंभीर जखमी झाल्याची घटना सोमवारी पहाटे घडली. गोळीबार करणारा उमेश घरत (रा. बेटेगाव) फरार झाला आहे. याप्रकरणी गुन्हा नोंद करण्यात आला असून पोलिसांनी शोधमोहीम सुरू केली आहे.
प्राथमिक माहितीनुसार, बेटेगाव येथील चिकन भुजिंग सेंटरचा मालक उमेश घरत आणि जखमी सुरेश वरखंडे यांच्यातील वैयक्तीक वादातून ही घटना घडल्याची माहिती आहे. दोघांमधील असलेल्या वादाच्या रागातून घरत याने सोमवारी पहाटे दोन ते तीनच्या दरम्यान महागाव येथील वरखंडे यांच्या घरात घुसून पिस्तुलातून गोळीबार केल्याची माहिती पोलिसांनी दिली.
या घटनेत सुरेश वरखंडे यांच्या डोक्याच्या मागील बाजूस गोळी लागून ते गंभीर जखमी झाले. त्यांना सुरुवातीला बेटेगाव येथील रुग्णालयात दाखल करण्यात आले; मात्र प्रकृती चिंताजनक असल्याने पुढील उपचारासाठी गुजरातमधील वापी येथील रुग्णालयात हलविण्यात आले.
पालघरचे पोलीस अधीक्षक यतीश देशमुख, उपविभागीय पोलीस अधिकारी विकास नाईक, पोलीस निरीक्षक सुनील जाधव व स्थानिक गुन्हे शाखेचे पोलीस निरीक्षक प्रदीप पाटील यांनी घटनास्थळी भेट देऊन पाहणी केली. फॉरेन्सिक पथकाने पंचनामा करून पिस्तूल व अन्य पुरावे जप्त केले आहेत. तपास सुरू आहे.