नाशिक : नाशिक- त्र्यंबकेश्वर येथे २०२६- २०२७ मध्ये होणाऱ्या सिंहस्थ कुंभमेळ्यानिमित्त भूसंपादनासह विविध विकासकामांना गती द्यावी. सर्व कामांचे नियोजन करीत ती कालबद्ध वेळेत पूर्ण करावीत. सर्व कामे गुणवत्तापूर्ण होतील याची दक्षता सर्व विभागांनी घ्यावी, असे निर्देश जलसंपदा तथा कुंभमेळामंत्री गिरीश महाजन यांनी येथे दिले.
नाशिक- त्र्यंबकेश्वर येथील आगामी कुंभमेळ्याच्या पार्श्वभूमीवर विभागीय आयुक्त कार्यालयातील सभागृहामध्ये आयोजित आढावा बैठकीत शुक्रवारी (दि. १५) ते बोलत होते. यावेळी आमदार सीमा हिरे, विभागीय आयुक्त डॉ. प्रवीण गेडाम, विशेष पोलिस महानिरीक्षक दत्तात्रय कराळे, पोलिस आयुक्त संदीप कर्णिक, अपर जिल्हाधिकारी बाबासाहेब पारधे, महापालिका आयुक्त मनीषा खत्री, कुंभमेळा आयुक्त करिश्मा नायर, नाशिक महानगर विकास प्राधिकरणाचे मुख्य कार्यकारी अधिकारी डॉ. माणिकराव गुरसळ, जिल्हा परिषदेचे मुख्य कार्यकारी अधिकारी ओमकार पवार, पोलिस अधीक्षक बाळासाहेब पाटील आदी उपस्थित होते.
आयुक्त डॉ. गेडाम यांनी सांगितले की, कुंभमेळ्यासाठी आवश्यक भूसंपादन प्रक्रियेबाबत जिल्हाधिकारी कार्यालयाने संनियंत्रण करावे. तसेच त्यांनी कुंभमेळ्याच्या पार्श्वभूमीवर सुरू असलेल्या कामांची माहिती दिली. या बैठकीत रिंगरोड भूसंपादन, त्र्यंबकेश्वर - गोदावरी पाणीपुरवठा योजना, घाटांचे बांधकाम, साधुग्राम भूसंपादन, रस्ते बांधकाम, रेल्वेस्थानक, ओझर विमानतळ विकासकामे आदींचा आढावा घेण्यात आला. महानगरपालिका आयुक्त खत्री, नायर, सार्वजनिक बांधकाम विभागाच्या अधीक्षक अभियंता अरुंधती शर्मा, पोलिस अधीक्षक पाटील, त्र्यंबकेश्वर नगर परिषदेच्या मुख्याधिकारी डॉ. श्रिया देवचक्के यांनी आपापल्या विभागांतर्फे सुरू असलेल्या कामांची माहिती दिली.
मंत्री महाजन म्हणाले की, आगामी कुंभमेळा विकास कामासंदर्भात कोणताही विलंब नको. सर्व कामे वेळेत पूर्ण होतील याची दक्षता घ्यावी. विकासकामे नियोजनबद्ध व दर्जेदार होतील याची दक्षता सर्व यंत्रणांनी घ्यावी. ही कामे पूर्ण करताना त्यांचा प्राधान्यक्रम निश्चित करावा. त्यातही रस्त्यांच्या कामांना प्राधान्य द्यावे तसेच कुंभमेळ्यात लोकसहभाग वाढविण्यासाठी उपक्रम राबवावेत, असेही त्यांनी सांगितले.