नाशिक : सिंहस्थ कुंभमेळ्याच्या अनुषंगाने ज्या कार्यान्वयीन यंत्रणांनी त्यांच्या कामांच्या प्रशासकीय आणि तांत्रिक मान्यता प्राप्त केल्या आहेत, त्यांनी कामांच्या निविदा प्रक्रिया जलदगतीने पार पाडाव्यात. इतर यंत्रणांनीही ही प्रक्रिया गतीने करत कामे वेळेत मार्गी लागतील, असे नियोजन करण्याच्या सूचना सिंहस्थ कुंभमेळा प्राधिकरणाचे अध्यक्ष डाॅ. प्रविण गेडाम यांनी दिल्या.
सिंहस्थ कुंभमेळा प्राधिकरणाच्या कामांच्या नियोजन आणि सद्य:स्थितीचा आढावा प्राधिकरणाचे अध्यक्ष डॉ. गेडाम आणि कुंभमेळा आयुक्त शेखर सिंह यांनी घेतला. यावेळी जिल्हाधिकारी आयुष प्रसाद, मनपा आयुक्त मनीषा खत्री, पोलिस आयुक्त संदीप कर्णिक, विशेष पोलिस महानिरीक्षक दत्तात्रय कराळे, जिल्हा परिषदेचे मुख्य कार्यकारी अधिकारी ओमकार पवार, मनपा अतिरिक्त आयुक्त करिश्मा नायर, जिल्हा पोलिस अधीक्षक बाळासाहेब पाटील यांच्यासह विविध विभागांचे अधिकारी उपस्थित होते.
यावेळी डॉ. गेडाम यांनी मनपा, आरोग्य, महावितरण, पोलिस, सार्वजनिक बांधकाम, जलसंपदा या विभागांसह इतर विभागांनी सुचवलेली कामे, त्यांची सद्य:स्थिती, प्रशासकीय व तांत्रिक मान्यता मिळालेली कामे, निविदा प्रसिद्ध झालेल्या कामांची माहिती, प्रत्यक्ष सुरूवात झालेल्या कामांबाबत तपशीलवार माहिती घेतली. मागील सिंहस्थ कुंभमेळ्यावेळी केलेल्या उपाययोजना, प्रयागराज येथे पार पडलेल्या कुंभमेळ्यात केलेल्या उपाययोजना लक्षात घेऊन सध्या तयार करण्यात आलेल्या आराखड्यावर आणि त्याच्या अंमलबजावणीवर चर्चा करण्यात आली.
प्रत्येक कामाचे होणार मॉनिटरींग
सिंहस्थ कुंभमेळ्यातील प्रत्येक कामांचे मॉनिटरिंग होणार आहे. त्यासाठी प्रोजेक्ट मॅनेजमेंट मॉनिटरिंग सिस्टीमद्वारे नियंत्रण राहणार आहे. प्रत्येक कामांचा तपशील यावर असणार आहे. कुंभमेळ्याच्या अनुषंगाने येणाऱ्या प्रत्येक बाबींवर संबंधित विभागाने सर्वंकष विचार करुन त्यांनी सादर केलेल्या आराखड्याप्रमाणे कार्यवाही करावी, असे निर्देश डॉ. गेडाम यांनी दिले.
या मुद्यांवर बैठकीत चर्चा
कुंभमेळ्यात येणाऱ्या भाविकांसाठीची वाहतूक व्यवस्था, संत महंतासाठीची निवास व्यवस्था, साधुग्राम, तेथील सोईसुविधा, कुंभमेळा कालावधीत कार्यरत अधिकारी, कर्मचाऱ्यांची व्यवस्था, वाहनमुक्त क्षेत्रातील गर्दी नियोजन, अत्यावश्यक सोयीसुविधांची उपलब्धता, कायदा व सुव्यवस्थेच्या अनुषंगाने करावयाची कार्यवाहीबाबत तपशीलवार चर्चा झाली.