नाशिक / सप्तशृंगगड : पुढारी वृत्तसेवा
नाशिक-त्र्यंबकेश्वर सिंहस्थ कुंभमेळा २०२७ पार्श्वभूमीवर श्रीक्षेत्र सप्तशृंगगडावर मोठ्या संख्येने भाविक येण्याची शक्यता असल्याने गर्दी व्यवस्थापन, वाहतूक, पिण्याचे पाणी, स्वच्छता, कचरा व्यवस्थापन, आरोग्य तसेच मूलभूत सुविधांचे आतापासूनच सूक्ष्म नियोजन करावे, असे निर्देश सिंहस्थ कुंभमेळा प्राधिकरणाचे आयुक्त शेखर सिंह यांनी दिले.
सप्तशृंगगड येथे कुंभमेळ्याच्या पूर्वतयारीसंदर्भात गुरुवारी (दि. १) आयोजित आढावा बैठकीत ते बोलत होते. यावेळी जिल्हा परिषदेचे मुख्य कार्यकारी अधिकारी ओमकार पवार, सार्वजनिक बांधकाम विभागाच्या मुख्य अभियंता अरुंधती शर्मा, उपवनसंरक्षक राकेश सेपट, निवासी उपजिल्हाधिकारी रोहितकुमार राजपूत, सहायक जिल्हाधिकारी डॉ. कश्मिरा संखे यांच्यासह विविध विभागांचे अधिकारी उपस्थित होते.
सिंहस्थ काळात नाशिक-त्र्यंबकेश्वर परिसरात येणारे भाविक सप्तशृंग गडासह परिसरातील धार्मिक स्थळांना भेट देण्याची शक्यता आहे. त्यामुळे गडाची भौगोलिक रचना, रस्ते, पार्किंग आणि भाविकांची सुरक्षित वाहतूक यांचे स्वतंत्र नियोजन करण्याच्या सूचना देण्यात आल्या.
बसस्थानक, शटल सेवा, खासगी वाहनांसाठी पार्किंग तसेच अग्निशमन दल, रुग्णवाहिका आणि आपत्कालीन सेवांसाठी स्वतंत्र मार्ग निश्चित करण्याचेही सांगण्यात आले. त्याचप्रमाणे वणी, नांदुरी व गड परिसरात पिण्याचे पाणी, मोबाईल स्वच्छतागृहे, तात्पुरती रुग्णालये, वैद्यकीय पथके व रुग्णवाहिकांची व्यवस्था करण्याचे निर्देश देण्यात आले. सार्वजनिक बांधकाम विभागामार्फत गड परिसरातील पायाभूत सुविधांसाठी प्रस्तावित नऊ कामांचा प्राधान्यक्रम निश्चित करण्याचेही सांगण्यात आले.
कचरा व्यवस्थापनावर भर:
सप्तशृंगगडावरील सध्याच्या कचरानिर्मितीचा बेसलाइन डेटा तयार करून त्यानुसार अतिरिक्त मनुष्यबळ, डस्टबिन व कचरा संकलन वाहनांची व्यवस्था करावी. निर्माल्य स्वतंत्रपणे संकलित करून त्यापासून अगरबत्ती, धूपबत्ती तयार करणाऱ्या संस्थांशी समन्वय साधावा. ओला कचरा प्रक्रिया प्रकल्पासाठी डीपीआर तयार करून निधीचे स्रोत निश्चित करण्याच्या सूचनाही आयुक्त शेखर सिंह यांनी संबंधित यंत्रणांना दिल्या आहेत.