नाशिक : पुढारी वृत्तसेवा
कोट्यवधी रुपयांच्या बहुचर्चित शालार्थ आयडी घोटाळ्याप्रकरणी विशेष तपास पथकाने (एसआयटी) दाखल केलेल्या दुसऱ्या गुन्ह्यात तब्बल १,१०० पानांचे दोषारोपपत्र नाशिकरोड येथील अतिरिक्त सत्र न्यायालयात दाखल केले आहे. दोषारोपपत्र दाखल झाल्याने या गुन्ह्याच्या न्यायालयीन सुनावणीला वेग आला आहे.
या प्रकरणात नितीन उपासनी गेल्या सात महिन्यांपासून न्यायालयीन कोठडीत आहेत. तर विद्यमान शिक्षण उपसंचालक भाऊसाहेब चव्हाण यांना यापूर्वी न्यायालयाने अटकेपासून संरक्षण दिले आहे. सुनावणीदरम्यान उपासनी यांच्या वकिलांनी त्यांच्या वैद्यकीय तपासणीची मागणी केली. त्यावर न्यायालयाने कारागृह अधीक्षकांना आवश्यक वैद्यकीय तपासणी करण्याचे निर्देश दिले असून, याबाबत गुरुवारी (दि. १६) पुढील सुनावणी होणार आहे.
एसआयटीच्या तपासात बनावट शालार्थ आयडी तयार करून शासनाची सुमारे १६० कोटी रुपयांची फसवणूक झाल्याचे निष्पन्न झाले आहे. या घोटाळ्यात नाशिक, धुळे, नंदुरबार, जळगाव, ठाणे आणि नवी मुंबई परिसरात गुन्हे दाखल झाले असून, एकूण ८४१ बनावट शालार्थ आयडी तयार करण्यात आल्याचे तपासात समोर आले आहे.
या प्रकरणात एक हजारांहून अधिक संशयितांचा सहभाग असल्याचा तपास यंत्रणांचा दावा आहे. दरम्यान, बेकायदेशीर मार्गाने मिळविलेल्या पैशांतून खरेदी करण्यात आलेल्या मालमत्तेचा तपासही सुरू असून, संशयितांच्या अपसंपदेचा शोध घेतला जात आहे. या दुसऱ्या गुन्ह्यात संशयितांची मालमत्ता जप्त करण्याची प्रक्रियाही सुरू होण्याची शक्यता व्यक्त केली जात आहे.
याच प्रकरणात अटक करण्यात आलेल्या एजंट प्रशांत वाडीले याची पोलीस कोठडी १७ जुलै रोजी संपत असून, पुढील तपासासाठी त्याला पुन्हा न्यायालयात हजर करून पोलीस कोठडी वाढविण्याची मागणी केली जाण्याची शक्यता आहे.