वणी : दिंडोरी तालुक्यातील चौसाळे गावात जुन्या भाडणांच्या कुरापती व सोडवा सोडवीत झालेल्या भांडणात १८ वर्षीय तरुणाचा खून झाला असून, आणखी एक युवक गंभीर जखमी झाला आहे. ही घटना दि. २२ ऑक्टोबर रोजी रात्री साडे दहा ते अकरा वाजेच्या दरम्यान पारा परिसरात घडली आहे.
मृत तरुणाचे नाव राहुल किशोर काळे (वय १८, रा. एकलहरे) असून, विजय पवार वय १७ हा युवक गंभीर जखमी झाला आहे. त्या रात्री चौसाळे गावात तमाशाचा कार्यक्रम सुरू होता. गर्दीच्या पार्श्वभूमीवर काही युवकांनी जुन्या वादाची कुरापत काढत वाद सुरू केला. हे भांडण सोडविण्यासाठी विशाल पवार पुढे आला असता मला का मारले असा जाब विचारल्याने त्यांच्यात वादावादी झाली त्याच्यावर कटरने वार करण्यात आला. त्याच गटातील राहुल काळे याच्यावरही तीक्ष्ण हत्याराने छाती व पाठीवर वार करण्यात आले. त्यात प्रचंड रक्तस्राव झाल्याने आणि वेळेवर उपचार न मिळाल्याने राहुलचा मृत्यू झाला.
घटनेची माहिती मिळताच वणी पोलिस ठाण्याच्या पोलिसांनी तात्काळ घटनास्थळी धाव घेतली. पोलिसांनी मृत राहुल व जखमींना रुग्णालयात हलवले. या घटनेनंतर पोलिसांनी तातडीने कारवाई करत सहा संशयितांना ताब्यात घेतले, त्यातमोहन लहु पवार, दीपक धनराज गायकवाड, योगेश बाळू गायकवाड, निवृत्ती पोपट चौधरी आणि दोन अल्पवयीन मुलांचा समावेश आहे.या प्रकरणी मृतक राहुल काळे यांच्या आईच्या फिर्यादीवरून वणी पोलिस ठाण्यात खूनाचा गुन्हा दाखल करण्यात आला असून, तपास सपोनी गायत्री जाधव यांच्या मार्गदर्शनाखाली पोलीस उपनिरीक्षक गणेश कुटे करीत आहेत. घटनेमुळे चौसाळे व परिसरात तणावाचे वातावरण आहे.