नाशिक : पुढारी वृत्तसेवा
खुनाच्या प्रयत्नाच्या गंभीर गुन्ह्यातील फरार असलेला रेकॉर्डवरील सराईत आरोपी गुन्हे शाखा युनिट-२ ने शिताफीने जेरबंद केला. प्रवीण उर्फ चाफ्या काळे (२४, रा. कॅनॉल रोड झोपडपट्टी, उपनगर, नाशिक) असे अटक केलेल्या आरोपीचे नाव आहे. दि. १ जानेवारी २०२६ रोजी दुपारी फिर्यादी घरी असताना आरोपी प्रवीणने त्यांच्याकडे दारू पिण्यासाठी पैशांची मागणी केली होती.
फिर्यादीने पैसे देण्यास नकार दिल्यावर आरोपीने शिवीगाळ व मारहाण करीत धारदार शस्त्राने जिवे मारण्याच्या उद्देशाने गंभीर दुखापत केली व फरार झाला. याप्रकरणी उपनगर पोलिस ठाण्यात गुन्हा दाखल करण्यात आला होता.
पोलिस हवालदार मनोहर शिंदे व चंद्रकांत गवळी यांना गुप्त बातमीदारामार्फत आरोपी आम्रपाली झोपडपट्टी, कॅनॉल रोड, उपनगर परिसरात वावरत असल्याची माहिती मिळाली होती. ही माहिती सहायक पोलिस निरीक्षक हेमंत तोडकर (प्रभारी अधिकारी, गुन्हे शाखा युनिट-२) यांना कळविण्यात आली. त्यांच्या आदेशानुसार पथकाने सापळा रचून आरोपीला शिताफीने ताब्यात घेतले.
चौकशीत आरोपीने गुन्ह्याची कबुली दिल्यानंतर त्याला उपनगर पोलिस ठाण्यात हजर करण्यात आले. ही कारवाई पोलिस आयुक्त, पोलिस उपायुक्त व सहायक पोलिस आयुक्त (गुन्हे) यांच्या मार्गदर्शनाखाली गुन्हेशाखा युनिट-२चे प्रभारी अधिकारी हेमंत तोडकर, सहायक पोलिस निरीक्षक डॉ. समाधान हिरे, संजय सानप, हवालदार नंदकुमार नांदुर्डीकर, मनोहर शिंदे, चंद्रकांत गवळी, तेजस मते, महेश खांडबहाले, प्रवीण वानखेडे व सुनील खैरनार यांनी यशस्वीपणे पार पाडली.