Nashik WhatsApp Hacking | व्हॉट्सअॅपवर 'पैसे पाठवा' मेसेजपासून सावधान

नाशिक : पुढारी वृत्तसेवा

सायबर गुन्हेगारांकडून नागरिकांची फसवणूक करण्यासाठी दिवसेंदिवस नव्या युक्त्या वापरल्या जात आहेत. आता व्हॉट्सअॅप हॅकिंगच्या माध्यमातून आर्थिक फसवणुकीचा नवा प्रकार वेगाने वाढत आहे. आपल्या परिचित व्यक्तीच्या व्हॉट्सअॅप क्रमांकावरून अचानक 'मला तातडीने पैशांची गरज आहे, कृपया लगेच पैसे पाठवा', असा संदेश येतो.

संबंधित व्यक्ती अडचणीत असल्याचे भासवून नागरिकांची सहानुभूती मिळवली जाते आणि त्यानंतर काही मिनिटांतच आर्थिक फसवणूक केली जाते. सायबर तज्ज्ञांच्या माहितीनुसार, गुन्हेगार प्रथम एखाद्या व्यक्तीचे व्हॉट्सअॅप खाते हॅक करतात किंवा त्याचा ताबा मिळवतात. त्यानंतर त्या व्यक्तीच्या संपर्क यादीतील मित्र, नातेवाईक, सहकारी आणि व्यावसायिक संपर्काना मदतीचे संदेश पाठवले जातात.

अनेकदा रुग्णालयातील उपचार, अपघात, तातडीचे बिल किंवा कौटुंबिक अडचणीचे कारण सांगून पैसे मागितले जातात. त्यामुळे मेसेज प्राप्त करणारी व्यक्ती भावनिकदृष्ट्या प्रभावित होते. अनेकवेळा संदेश मिळाल्यानंतर खातरजमा करण्यासाठी संबंधित व्यक्तीला फोन लावला जातो. मात्र त्यांचा मोबाइल क्रमांक बंद, स्विच ऑफ किंवा नेटवर्क क्षेत्राबाहेर असल्याचे दिसून येते.

त्यामुळे खरोखरच काही आपत्तिजनक परिस्थिती निर्माण झाली असावी, अशी भावना निर्माण होते. याच मानसिकतेचा फायदा घेत भामटे नागरिकांकडून तातडीने ऑनलाइन व्यवहार करून घेतात. विशेष म्हणजे, अशा संदेशांमध्ये संबंधित व्यक्तीचे नाव, छायाचित्र आणि वैयक्तिक माहिती असल्यामुळे तो संदेश खरा असल्याचा भास होतो.