सिडको (नाशिक) : समस्यामुक्त शहर होणेकामी महानगरपालिका प्रशासनाने ठोस पावले उचलणे अवश्यक असून निधीची उपलब्धता, निविदा प्रक्रिया, वर्कऑर्डर आणि प्रत्यक्ष कामांना प्रारंभ करणे क्रमप्राप्त आहे. पश्चिम विधानसभा मतदार संघातील पाणी पुरवठा सतत विस्कळीत होणे, कुणाच्या तरी सांगण्यावरून व्हॉलमन पाणी सोडण्यास भेदभाव करत असल्याची बाब गंभीर असून पाणी समतोलपणे सोडण्यासाठी योग्य ती उपाययोजना तातडीने करण्याच्या सूचना उपमुख्यमंत्री एकनाथ शिंदे यांनी आयुक्त मनिषा खत्री यांना दिल्या आहेत.
आ. सीमा हिरे यांच्या पाठपुराव्यातून उपमुख्यमंत्री एकनाथ शिंदे यांनी विधीमंडळातील त्यांच्या दालनात शनिवार (दि.19) रोजी बैठकीचे आयोजन होते. बैठकीत मार्गदर्शन करतांना एकनाथ शिंदे यांनी महापालिका प्रशासनाला विषेश सूचना दिल्या. बैठकीस उप मुख्यमत्र्यांचे प्रधान सचिव नवीन सोना, सहसचिव कैलास बिलोणीकर, नितीन दळवी, नगरविकासचे उप सचिव अजिक्य बगाडे, कक्ष अधिकारी मोसीन बागवान, सिडको व्यवस्थापक शहर सेवा -१चे करण शिंदे, व्हिजीन वामनन, महापालिकेच्या पाणीपुरवठा विभागाचे अधिक्षक अभियंता रविंद्र धारणकर आदी अधिकारी उपस्थित होते. महापालिका आयुक्त मनिषा खत्री या व्हिसीव्दारे बैठकीस उपस्थित झाल्या होत्या. बैठकीच्या सुरुवातीलाच आमदार हिरे यांनी महानगरपालिका संदर्भात असलेल्या समस्यांविषयी तीव्र नाराजी व्यक्त करत अवघ्या दिड वर्षांवर येवून ठेपलेल्या सिंहस्थापूर्वी सर्वच समस्या सोडवून विकासकामे पूर्ण करण्याची आग्रही मागणी एकनाथ शिंदे यांच्याकडे केली.
बैठकीत पाश्चिम विधानसभा मतदार संघातील सतत विस्कळीत होणारा पाणीपुरवठा, वाढते अतिक्रमणे, सिडकोतील पेलिकन पार्कची झालेली दुरावस्था, घरपट्टी आणि पाणीपट्टीची वसूलीसाठी विशेष मोहिम राबविणे, रूग्णालये आणि हॉटेलांमधील सुरक्षा व्यवस्थे संदर्भात विशेष उपाययोजना राबवावी, महिला बचत गटांच्या विविध उपक्रमांसाठी म्हाडाच्या जागेवर महिला भवनाची उभारणी करणे, अंबड येथील प्रकल्पग्रस्त शेतकऱ्यांनी उभारलेले शेड नियमित करणे, स्व.दादासाहेब फाळके यांच्या स्मारकाची झालेली दुरावस्था, गंगापूर धरणातून थेट पाईपलाईन टाकण्याच्या कामात होत असलेली दिरगाई, वाहनांसाठी पार्किंग स्थळे विकसित करणे, आयटी आणि लॉजिस्टिक पार्कची उभारणी, भूसंपादनाचा मोबदला देतांना शेतकऱ्यांच्या ऐवजी विकसकांना दिलेले प्रधान्य, महापालिकेतील रखडलेली नोकरभरती आदी समस्यांवर विशेष चर्चा करण्यात आली.
सिडको, सातपूर, पाथर्डीफाटा परिसरातील सतत विस्कळीत होणाऱ्या पाणीपुरवठयाच्या मुद्याची तड लावण्यासाठी व्हॉलमनचे नव्याने टेंडर काढा. पाणी वितरणाचे शेड्यूल तयार करून अधिकाऱ्यांचे नंबर प्रसिद्ध करा, पावसाने उसंत घेताच गॅसलाईन आणि पावसामुळे उखडलेले खड्डे बुजविण्याचे काम सुरू करा. तसे करतांना प्रथम मोठया रस्त्यांवरील खड्डे बुजवा, अधिकाधिक निधी उपलब्ध करून फाळके स्मारकाची दूरावस्था दूर करा, पेलिकन पार्कच्या आधुनिकीकरणसाठी आम्ही नगरविकास मधूनही निधी उपलब्ध करून देवू. सिहंस्थाच्या निधीतूनही पेलिकन पार्कवर खर्च करा, मोकळ्या जागा विकसित करून पार्किंग स्थळांची निर्मिती करा, रुग्णालये आणि हॉटेलच्या लायसन्सच्या नूतणी करणाची प्रक्रिया ऑनलाईन करा. पाणीपट्टी,घरपट्टीच्या वसूलीत वाढ होण्यासाठी अभिनव उपक्रम राबवा आणि शास्ती माफ करण्याचा प्रस्ताव पाठवा. आयटी पार्क उभारणीच्या प्रस्तावाला गती देण्यासाठी एमआयडीसी सोबत बैठक लावा, भिवंडी पॅटर्नच्या धर्तीवर अंबड येथील प्रकल्पग्रस्त शेतकऱ्यांचे शेड नियमित करण्यासाठी प्रस्ताव मंत्रालयात पाठवा अशा सूचना उपमुख्यमंत्री एकनाथ शिंदे यांनी आयुक्त मनिषा खत्री यांना बैठकीत केल्या.
शहरातील अतिक्रमण काढण्याच्या मोहिमेला गती देण्यासाठी आर्मीतून सेवानिवृत्त झालेल्या साठ जणांना ठेकेदारी पध्दतीने अतिक्रमण विभागात घेण्यात येणार असून भूसंपादनापोटी विकसकांना दिल्या गेलेल्या ५५ कोटी पैकी तीस कोटींचे प्रस्तावच रद्द केल्याची माहिती आयुक्त खत्री यांनी नामदार शिंदे यांना दिली.दरम्यान महापालिकेतील भरती करण्यासंदर्भातील आकृतीबंद प्रस्तावास शासनाने मंजूरी दिलेली असून बिंदू नामावलीस मान्यता न मिळाल्याने भरती प्रक्रिया रखडला असल्याची माहिती समोर येताच नामदार यांनी बैठकीतून सेक्रेटरी राजेशकुमार यांना फोन केला.सिहस्थ जवळ आल्याने महापालिकेत भरती होणे गरजेचे असून बिंदू नामावलीस तातडीने मान्यता देण्याची सूचना केली.