नाशिक : बी. डी. भालेकर मनपा शाळा पाडून त्या जागी विश्रामगृह उभारण्याचा नाशिक महापालिकेचा प्रस्ताव रद्द करून तेथे पुन्हा शाळाच सुरू करण्यासाठी निर्णय प्रक्रियेला चालना देण्यात शिक्षणमंत्री दादा भुसे यांनी घेतलेल्या सकारात्मक भूमिकेबद्दल बी. डी. भालेकर शाळा बचाव समितीने भुसे यांना आभारपत्र सादर केले आहे. भालेकर शाळेच्या जागेवर अत्याधुनिक सुविधांसह 'आदर्श मराठी मॉडेल स्कूल'ची उभारणी करण्याची मागणी या पत्राद्वारे करण्यात आली आहे.
महापालिका तसेच जिल्हा परिषदेच्या आदर्श शिक्षक पुरस्कार वितरण सोहळ्यांच्या निमित्ताने गुरुवारी (दि.२०) नाशिक दौऱ्यावर आलेल्या मंत्री भुसे यांची शाळा बचाव समितीच्या शिष्टमंडळाने भेट घेतली. नाशिक महापालिकेच्या हद्दीत सध्या १०० शाळांमध्ये साधारण ३२ हजार विद्यार्थी व ९०० शिक्षक कार्यरत असून, या शाळा गरीब, वंचित व स्थलांतरित कुटुंबांच्या मुलांसाठी शिक्षणाची आधारस्तंभ आहेत. या शाळांची गुणवत्ता वाढवण्यासाठी मॉडेल स्कूल उभारणे महत्त्वाचे असल्याचे समितीने नमूद केले. बालवाडीपासून इयत्ता बारावीपर्यंतचे मोफत शिक्षण, कौशल्यविकास प्रशिक्षण केंद्र, सुसज्ज कार्यशाळा, २०० आसनी अद्ययावत सभागृह, शिक्षक व नागरिकांसाठी शैक्षणिक संदर्भ ग्रंथालय अशा सुविधा शाळेत उपलब्ध करून देण्याचा प्रस्ताव समितीने सादर केला. याप्रसंगी राजू देसले, दीपक डोके, राजेंद्र बागुल, तल्हा शेख, गजू घोडके, पद्माकर इंगळे, वसंत एकबोटे आदी उपस्थित होते.
सिंहस्थ निधीतून शाळा उभारू!
शाळेच्या जागेवरच नवीन शाळा सुरू करू. लवकरच उपमुख्यमंत्री एकनाथ शिंदे यांच्या उपस्थितीत बी. डी. भालेकर शाळा बचाव समितीची विशेष बैठक आयोजित केली जाईल. कुंभमेळा निधीतूनही शाळा उभारणीसाठी सहकार्याचा प्रयत्न करू, अशी ग्वाही शिक्षणमंत्री भुसे यांनी यावेळी भालेकर शाळा बचाव समितीच्या शिष्टमंडळाला दिली.