नाशिक (सातपूर) : पुढारी वृत्तसेवा
येथील सातपूर गावातील शिवाजी चौकात एका घरात आग लागून संसारोपयोगी साहित्य खाक झाल्याची घटना बुधवारी, दि.28 घडली. राज कारभारी सौंदणकर यांच्या घरातून बुधवारी दुपारी काही तरी जळत असल्याचा वास तसेच धूर घरात शेजारील रहिवासी सामाजिक कार्यकर्ते दिनकर शिरसाठ यांना दिसून आल्याने त्यांनी तत्काळ अग्निशमन विभागाला फोन केला. त्यामुळे अग्निशमन विभागाचे दोन बंब तत्काळ घटनास्थळी दाखल झाले. मात्र, तोपर्यंत घरातील सर्व साहित्यांसह मौल्यवान वस्तू जळून खाक झाल्या. यात सौंदणकर यांच्या घरातील जीवनावश्यक वस्तू, महत्त्वाची कागदपत्रांसह अन्य साहित्य जळून खाक झाले. आग कोणत्या कारणांमुळे लागली हे मात्र समजू शकलेले नाही.