जळगाव : जळगाव तालुक्यातील निमखेडी येथे धारदार शस्राने वार करून तरूणाची निर्घृण हत्या करण्यात आली.सागर साहेबराव सोनवणे (वय २७) खून झालेल्या तरूणाचे नाव असून ही घटना रविवारी दि.१४) रात्री घडली. याप्रकरणी पोलिसांनी एका संशियताला ताब्यात घेतले आहे. या घटनेने परिसरात मोठी खळबळ उडाली आहे.
याबाबत मिळालेली माहिती अशी की, रविवारी रात्री मारेकऱ्यांनी सागर सोनवणे याच्या डोक्यात धारदार शस्त्राने वार केले आणि त्याला गंभीर जखमी अवस्थेत निमखेडी गावातील राममंदिराजवळ फेकून दिले. घटनेची माहिती मिळताच नातेवाईक आणि ग्रामस्थांनी तातडीने जखमी सागरला शासकीय वैद्यकीय महाविद्यालय व रुग्णालयात दाखल केले. मात्र, डॉक्टरांनी तपासणीनंतर त्याला मयत घोषित केले. मृत सागरच्या पश्चात त्याचे आई-वडील आणि लहान भाऊ असा परिवार आहे. दरम्यान पूर्ववैमनस्यातून हा खून झाल्याचा संशय व्यक्त करण्यात येत असून याप्रकरणी तालुका पोलिसांनी एका संशयिताला ताब्यात घेतले आहे. अन्य संशयितांचा शोध घेण्यासाठी पोलीस पथके रवाना झाली असून, पुढील तपास वेगाने सुरू आहे.