जळगाव : शहरातील महाविद्यालय परिसरात भरधाव वाहन चालविणे, वाहतुकीच्या नियमांचे उल्लंघन करणे आणि टवाळखोरी करणाऱ्या अल्पवयीन वाहनचालकांविरोधात जळगाव वाहतूक पोलिसांनी विशेष मोहीम राबवून कठोर कारवाई केली. या मोहिमेत २४ अल्पवयीन चालकांवर कारवाई करण्यात आली असून, त्यांच्या पालकांनाही पोलीस ठाण्यात बोलावून समज देण्यात आली.
महाविद्यालये सुरू व सुटण्याच्या वेळेत वाढणारी वाहतूक कोंडी, विनापरवाना वाहन चालविणे आणि बेदरकार वाहनचालकांमुळे होणारे अपघात रोखण्याच्या उद्देशाने ही मोहीम हाती घेण्यात आली होती. कारवाईदरम्यान वाहतूक नियमांचे उल्लंघन करणाऱ्या वाहनचालकांविरुद्ध ११९ ई-चलन जारी करण्यात आले.
या विशेष मोहिमेत विविध वाहतूक नियमांचे उल्लंघन करणाऱ्यांकडून १ लाख ४७ हजार रुपयांचा दंड आकारण्यात आला. त्यापैकी ८२ हजार रुपये जागेवरच वसूल करण्यात आले. अचानक झालेल्या या कारवाईमुळे महाविद्यालय परिसरातील नियमभंग करणाऱ्या वाहनचालकांमध्ये चांगलीच धास्ती निर्माण झाली आहे.
ही कारवाई प्रोबेशनरी उपविभागीय पोलीस अधीक्षक सह्याद्री बिरसे आणि प्रशांत दरेकर यांच्या नेतृत्वाखाली, वाहतूक शाखेचे पोलीस निरीक्षक मोरेश्वर पेंदाम यांच्या मार्गदर्शनाखाली करण्यात आली.
शहरात कायदा व सुव्यवस्था राखणे आणि रस्ते अपघातांना आळा घालण्यासाठी महाविद्यालय परिसरासह प्रमुख मार्गांवर यापुढेही अशाच प्रकारच्या विशेष मोहिमा राबविण्यात येणार असल्याचे पोलिसांनी स्पष्ट केले आहे. तसेच पालकांनी आपल्या अल्पवयीन मुलांना वाहन चालविण्यास देऊ नये, असे आवाहनही करण्यात आले आहे.