जळगाव : एमआयडीसी परिसरात अवैध दारू विक्रेत्याने केलेल्या गोळीबारात जखमी तरूणाचा उपचारादरम्यान मृत्यू झाला तर दुसऱ्याची प्रकृती चिंताजनक आहे. ही घटना घटना रविवारी (दि.२) रात्री १०.१५ च्या सुमारास घडली. या घटनेमुळे परिसरात खळबळ उडाली आहे.
शहराच्या एमआयडीसी परिसरात कंपनीबाहेर अवैधरित्या दारू विक्री करणाऱ्या एका व्यक्तीने किरकोळ वादातून कंपनीतील दोन कामगारांवर गोळीबार केल्याची धक्कादायक घटना रविवारी रात्री १०.१५ च्या सुमारास घडली होती. एमआयडीसी, जी सेक्टरमधील कंपनीच्या बाहेर हा प्रकार घडला. कंपनीत नाईट ड्युटीसाठी जाणारा कामगार सरफु शेख हा एका टपरीवर थांबला असता, दारू अड्डा चालवणारा एक इसम एका व्यक्तीला मारहाण करत होता. सरफु शेख याने हे पाहिले असता, दारू विक्रेत्याने त्यालाही मारहाण करण्यास सुरुवात केली. या मारहाणीनंतर सरफु शेख याने कंपनीत काम करणाऱ्या आपले दोन भाऊ, राजन शेख रफिउल्ला (वय २०) आणि अहमद फिरोज शेख (वय २६) यांना बोलावले. हे तिघे कंपनीबाहेर आले असता, दारू विक्रेत्याने त्यांना शिवीगाळ केली. त्याचवेळी तेथे उपस्थित असलेल्या एका महिलेने त्याला गावठी पिस्तूल दिले. आरोपीने क्षणाचाही विलंब न करता या कामगारांवर चार ते पाच गोळ्या झाडल्या.
या गोळीबारात राजन शेख रफिउल्ला आणि अहमद फिरोज शेख हे दोघे गंभीर जखमी झाले व त्यांना तातडीने जिल्हा रुग्णालयात दाखल करण्यात आले आहे. जखमींपैकी एकाची प्रकृती चिंताजनक होती. यात उपचार सुरु असतांना आज राजन शेख रफिउल्ला याचा मृत्यू झाला. तो मूळचा उत्तर प्रदेशातील असून गेल्या तीन वर्षांपासून येथे कंपनीत कामाला होता. या गोळीबाराच्या घटनेमुळे एमआयडीसी परिसरात खळबळ उडाली आहे.