जळगाव:जिल्ह्यात फोफावलेल्या अवैध दारू निर्मिती, वाहतूक आणि छुप्या विक्रीच्या काळ्या धंद्यांवर राज्य उत्पादन शुल्क विभागाच्या जळगाव पथकाने जोरदार दणका दिला आहे. सप्टेंबर २०२६ या महिनाभरात राबवण्यात आलेल्या धडक विशेष मोहिमेत तब्बल ३४ लाख ४४ हजार ३९० रुपयांचा मुद्देमाल जप्त करण्यात आला. या धडक कारवाईमुळे जिल्ह्यातील अवैध मद्यविक्रेते आणि हातभट्टी चालकांचे धाबे चांगलेच दणाणले आहेत.
उत्पादन शुल्क विभागाने गुप्त माहितीच्या आधारे जिल्ह्यातील संशयित अड्डे आणि मार्गांवर धाडींचे सत्र राबवले. महिनाभरात १९० गुन्हे नोंदवून १६२ आरोपींना बेड्या ठोकल्या आहेत. कारवाईदरम्यान तस्करीसाठी वापरली जाणारी ८ वाहनेही जप्त करण्यात आली आहेत.
६३ हजार लिटर घातक रसायन जागेवरच खाक
ग्रामीण भागातील नद्या, नाल्यांच्या काठी छुप्या पद्धतीने चालणाऱ्या हातभट्टी अड्ड्यांवर पथकाने थेट धडक दिली. दारू गाळण्यासाठी सडवत ठेवलेले तब्बल ६३ हजार ८०० लिटर घातक कच्चे रसायन शोधून काढून ते घटनास्थळीच नष्ट करण्यात आले. यामुळे हातभट्टी माफियांना मोठा आर्थिक फटका बसला आहे.
जप्त मुद्देमालाचा तपशील:
हातभट्टी दारू: ३,१३५ लिटर
ताडी: ७७३ लिटर
देशी दारू: २९२ लिटर
बिअर: ६८ लिटर
विदेशी दारू: ४३ लिटर
जप्त वाहने: ८
एकूण जप्त किंमत: ₹३४,४४,३९०/-
अवैध मद्य व्यवसाय, वाहतूक आणि विक्री करणाऱ्यांविरोधात ही मोहीम अशीच अविरत सुरू राहणार असून, कायद्याचे उल्लंघन करणाऱ्यांची गय केली जाणार नाही, असा सज्जड इशारा राज्य उत्पादन शुल्क विभागाकडून देण्यात आला आहे.