देशभरामध्ये तसेच राज्यामध्ये अत्याचार आणि विनयभंग झाल्याच्या घटना उघडकीस येत आहेत. तसेच आता जळगावमधील सुद्धा एका अल्पवयीन मुलीवर अत्याचार केल्याची घटना उघडकीस आली. सावदा येथील गावामध्ये अल्पवयीन मुलीस तिच्या ओळखीतील मुलांनी फूस लावून शारिरीक अत्याचार केला आहे. या प्रकरणी सावदा पोलीस स्टेशनमध्ये अत्याचार आणि विनयभंग केल्याप्रकरणी गुन्हा दाखल करण्यात आला आहे.
सावदा येथील गावात अल्पवयीन मुलीस तिच्या ओळखीतील मुलांनी अत्याचार केला या घटनेचे गांभीर्य ओळखून पोलिस अधीक्षक डॉ. महेश्वर रेड्डी, अपर पोलिस अधीक्षक अशोक नखाते यांच्या आदेशाप्रमाणे उपविभागीय पोलिस अधिकारी शिंदे यांच्या मार्गदर्शनाखाली सावदा पोलिस स्टेशनचे सपोनि विशाल पाटील, पोलिस उपनिरिक्षक अमोल गर्जे यांनी पोलिस पथकाच्या साहाय्याने गतीमान हालचाली करून अवघ्या तीन तासाच्या आत २ संशयित आरोपींना व एका अल्पवयीन आरोपीला ताब्यात घेतले. त्यांच्यावर बाल लैंगिक संरक्षण कायदा २०१२ अंतर्गत गुन्हा दाखल करण्यात आला. प्राथमिक तपास करून संशयित अल्पवयीन आरोपीला बालन्यायालय व इतर दोन संशयित आरोपींना सत्र न्यायालयात हजर करून पुढील कायदेशीर कारवाई केली आहे.