श्रीरामपूर: बेलापूर-उक्कलगाव रोडवर वाबळे वस्तीवर सहा जण रात्री साडेआठ वाजताच चोरीच्या उद्देशाने दबा धरून बसल्याचा संशय आल्यामुळे तेथील शेतकऱ्याने बंदुकीतील त्यांच्या दिशेने गोळीबार केला. त्यात एक चोरटा थोडक्यात बचावला व सहाही चोरटे दोन मोटरसायकलींवरून पसार झाल्याचे सांगण्यात आले.
प्रवरा नदीकाठावर गेल्या चार दिवसांपासून रात्रीच्या वेळी आकाशात तीन ड्रोन घिरट्या घालत असल्याचे आढळून आले. त्यानंतर काही ठिकाणी अज्ञात व्यक्तीही फिरताना आढळल्या. दोन दिवसांपूर्वी नागरिकांनी आंबे दवणगाव येथे अनोळखी व्यक्तींना पकडण्याचा प्रयत्न केला; परंतु ते मोटरसायकली सोडून पसार झाले.
नागरिकांनी त्या मोटरसायकली तोडल्या. त्यानंतर कालही केसापूर, आंबे दवणगाव, बेलापूर, सातभाई वसाहत या ठिकाणी रात्री ड्रोन घिरट्या घालत होते. पोलिसांनीही गस्त घातली; परंतु त्याचा उपयोग झाला नाही. सोमवारी (दि. 25) रात्री साडेआठ वाजताच बेलापूर-उक्कलगाव रोडवर शिवाजी पाटील वाबळे यांच्या वस्तीलगत सहा जण दबा धरून बसल्याचे त्यांच्या कुटुंबीयांच्या लक्षात आले.
त्यांनी ताबडतोब एकमेकांना फोन केले. त्यामुळे गावातील काही युवकही मदतीला धावले. त्या वेळी शिवाजी पाटील वाबळे यांनी आपल्या परवाना असलेल्या बंदुकीतील एक राऊंड फायर केला. त्यात एक संशयित चोरटा थोडक्यात बचावला व सहाही चोरटे आपल्या दोन मोटरसायकलींवरून पसार झाले.
प्रवरा काठावरील लोक चोरट्यांमुळे धास्तावलेले आहेत. ड्रोन फिरणे, अनोळखी इसम येणे, कधी चारचाकीतून तर कधी दुचाकीवरून येतात, त्यांच्याकडे हत्यारे असतात, बंदुकी असतात अशी नागरिकांत चर्चा आहे. त्यामुळे एकांतात वस्त्या असलेले नागरिक जीव मुठीत धरून रात्र काढत आहेच. आकाशात फिरणारे ड्रोन नेमके कशाचे आहेत, याची हाताळणी कोण करते, याबाबत पोलिसांनी शोध घ्यावा, अशी नागरिकांची मागणी आहे व जे अनोळखी इसम फिरत आहेत त्यांचादेखील बंदोबस्त करावा, अशी नागरिकांची मागणी आहे.