शिर्डी: श्री साईबाबा संस्थान विश्वस्त व्यवस्था (शिर्डी) च्या वतीने यावर्षी मंगळवार दि. २८ ते गुरुवार दि. ३० जुलै याकाळात श्री गुरुपौर्णिमा उत्सव साजरा करण्यात येणार आहे. त्यासाठी साईसंस्थानच्या वतीने जय्यत तयारी करण्यात आली आहे.
श्री साईबाबा संस्थाकडून श्री गुरुपौर्णिमा उत्सवाच्या १,६६,५६० भक्तमंडळ सभासदांना निमंत्रण पत्रिका पाठविण्यात आलेल्या असून, संदेश व इ-मेलद्वारे ३,५२,८२३ देणगीदार साईभक्तांना आमंत्रित करण्यात आले आहे. फुलांच्या सजावटीमध्ये वेगवेगळ्या देशी व विदेशी प्रकारच्या फुलांच्या समावेशातून श्री साईबाबांची प्रतीमेसह हत्ती व विविध प्रकारचे पक्षी साकारण्यात येणार आहेत. तसेच उत्सवकाळात विविध धार्मिक व सांस्कृतिक कार्यक्रमांचे आयोजन करण्यात आल्याची माहिती संस्थानचे मुख्य कार्यकारी अधिकारी गोरक्ष गाडीलकर यांनी दिली.
याही वर्षी श्री गुरुपौर्णिमा उत्सवा निमित्त वेगवगळया ठिकाणांहुन येणाऱ्या ४५ पालख्यांनी नोंदणी केलेली आहे. उत्सवात होणारी संभाव्य गर्दी लक्षात घेवून दर्शनाची व्यवस्था सुखकर व्हावी, तसेच भाविकांचे पावसापासुन संरक्षणाकरीता मंदिर व संस्थान परिसरात सुमारे ६८ हजार चौ.फुट मंडप उभारण्यात आलेला आहे.
तसेच साईभक्तांच्या अतिरिक्त निवासव्यवस्थे करीता साईबाबा भक्त निवासस्थान (५०० रुम), साईधर्मशाळा याठिकाणी सुमारे २८ हजार चौ.फुट निवासी पावसाळी मंडप, बिछायत व कनातीसह मंडपाची उभारणी करण्यात आलेली असून यामध्ये विद्युत, पाणी पुरवठा, स्वच्छतागृह व सुरक्षा व्यवस्था ठेवण्यात आलेली आहे.
श्री साई प्रसादालयात तीन दिवस मिष्ठान्न भोजन प्रसाद, तसेच दर्शनरांगेत व परिसरात भक्तांना चहा, कॉफी व दुधाची व्यवस्था, वेगवेगळ्या ठिकाणी प्रथमोपचार केंद्रही कार्यान्वित असणार आहेत. या उत्सवास साईभक्तांनी उपस्थित राहून शोभा वाढवावी, असे आवाहन गाडीलकर यांनी केले आहे.
या सोहळ्यासाठी संस्थानचे तदर्थ समितीचे अध्यक्ष तथा प्रमुख जिल्हा व सत्र न्यायाधीश शिवाजीराव कचरे, समिती सदस्य तथा जिल्हाधिकारी डॉ. पंकज आशिया, मुख्य कार्यकारी अधिकारी गोरक्ष गाडीलकर व उप कार्यकारी अधिकारी भिमराज दराडे यांच्या मार्गदर्शनाखाली संस्थानचे सर्व कर्मचारी प्रयत्नशिल आहे.