नगर: अवैध गर्भलिंग निदान प्रकरणात श्रीरामपूर पोलिसांनी शिरूरमधून आणखी एका डॉक्टरला अटक केली. अटकेतील या डॉक्टरला न्यायालयाने आठ दिवसांची पोलिस कोठडी सुनावली आहे.
ज्ञानेश्वर नायकोडी (बीएएमएस, शिरूर, पुणे) असे अटकेतील डॉक्टरचे नाव आहे. पिंपरी निर्मळ शिवारात अवैध गर्भलिंग निदान केंद्राचा पर्दाफाश करत पोलिसांनी डॉक्टर, मेडिकल चालक, पुरवठादार व महिलांच्या नातेवाईकांना अटक केली होती.
या प्रकरणात सामील असलेल्या अनेक एजंटांनाही अटक करण्यात आली. तपासात गुन्ह्यांची व्याप्ती वाढतच आहे. डॉ. नायकोडी यास अटक केल्यानंतर राहाता न्यायालयाने त्यास ८ दिवसांची पोलिस कोठडी सुनावाली.
डॉ. नायकोडी हा गर्भवती महिलांची तपासणी करत होता, गर्मवती महिला तपासणीला नेमके कोण पाठ:वत होते.?किती महिलांच्या गर्भलिंग निदान चाचण्या केल्या आणि किती गर्भपात केले? याची चौकशी करण्यासाठी पोलिसांनी कोठडीची मागणी केली. त्यानुसार न्यायालयाने कोठडी सुनावली.
अटकेतील डॉक्टरांची संख्या ८ वर
आतापर्यंत या गुन्ह्यात अटकेतील आरोपींची संख्या २४ झाली असून त्यात ८ डॉक्टर आहेत. तिघे मेडिकल चालक तर एक औषध पुरवठादार आहे. आता पर्यंत पोलिसानी सहा सोनोग्राफी मशीन वेगवेगळ्या ठिकाणावरून जप्त केल्या आहेत. पोलिस उपअधीक्षक अमोल भारती, सहाय्यक पोलिस निरीक्षक युवराज आठरे अधिक तपास करत आहेत.