मुंबई : मालेगावच्या उपमहापौरांच्या केबिनमध्ये टिपू सुलतानचे छायाचित्र लागले आणि राज्यभर राजकीय गदारोळ उठला. या वादात उडी घेत काँग्रेसचे प्रदेशाध्यक्ष हर्षवर्धन सपकाळ यांनी टिपू सुलतानची बरोबरी थेट छत्रपती शिवाजी महाराजांशी केल्याने हा वाद चिघळला. या गोंधळात आता मुंबई महानगरातील दोन रस्ते अचानक रडारवर आले आहेत. याचे कारण या दोन्ही रस्त्यांना टिपू सुलतानचेच नाव दिले गेले आहे.
पूर्व उपनगरांतील एम. पूर्व गोवंडी येथील बाजीप्रभू देशपांडे मार्गापासून सुरू होऊन रफीनगर नाल्यापर्यंत जाणाऱ्या शिवाजी नगर मार्ग क्र. 4 या रस्त्याला ‘शहीद टिपू सुलतान मार्ग’ असे नाव देण्याचा ठराव एम. पूर्व प्रभाग समितीमध्ये भारतीय जनता पक्षाचे एकमेव नगरसेवक विठ्ठल खरटमोल यांनी 26 जुलै 2013 रोजी ठराव मांडला होता. हा प्रस्ताव पुढे 27 डिसेंबर 2013 रोजी झालेल्या महापालिकेच्या सर्वसाधारण सभेतही बिनविरोध मंजूर झाला.
या प्रस्तावाचे सूचक होते यशोधर फणसे आणि अनुमोदन दिले होते तत्कालीन नगरसेवक अमित साटम यांनी ! त्यावेळी आजच्या महापौर आणि तत्कालीन नगरसेविका रितू तावडे यांच्यासह भाजपचे 21 सदस्य सभागृहात उपस्थित होते. यापैकी कुणीही टिपू सुलतानचे नाव देण्यास विरोध केल्याची नोंद कामकाजात नाही. मूळ प्रस्तावच भाजप नगरसेवकाने मांडलेला असल्याने तो बिनविरोध मंजूर झाला. त्यावर आवाज उठवला नव्हता.
अंधेरी पश्चिमेकडील गिल्बर्ट हिलमार्गे सी. डी. बर्फीवाला मार्गाच्या नाक्यापर्यंत जाणाऱ्या रस्त्याचे ‘शेर-ए-म्हैसूर टिपू सुलतान मार्ग’ असे नामकरण करण्याचा ठराव 23 एप्रिल 2001 रोजी महापालिका सभागृहात मांडण्यात आला. या ठरावाचेही सूचक भाजपचे नगरसेवक विठ्ठल खरटमोल हेच होते, तर अनुमोदन काँग्रेस पक्षाचे मोहसीन हैदर यांनी दिले होते. त्यांच्या उपस्थितीत सदर नावाचा ठराव एकमताने मंजूर करण्यात आला होता. त्यावेळीही भाजपाचे 21 नगरसेवक उपस्थित होते.
आता बदलत्या राजकीय-धार्मिक वातावरणात या दोन्ही रस्त्यांना दिलेले ‘शहीद टिपू सुलतान’ हे नाव आता सत्तारूढ भारतीय जनता पक्षाकडून रद्द केले जाणार का, याबद्दल कमालीची उत्सुकता आहे.