डोंबिवली : पुढारी वृत्तसेवा
कल्याण-डोंबिवली महानगरपालिकेच्या असलेल्या हभप सावळाराम महाराज म्हात्रे क्रीडा संकुलातील अनधिकृत दुकाने तोडण्याची कारवाई महापालिकेच्यावतीने करण्यात येत होती. या कामात डोंबिवलीतील शिवसेनेच्या तीन माजी नगरसेवकांनी अडथळा आणल्याप्रकरणी कल्याण जिल्हा व सत्र न्यायालयाने दोन वर्षे सक्तमजुरी आणि प्रत्येकी 50 हजार रुपये दंडाची शिक्षा सुनावली आहे. याशिवाय दंड न भरल्यास आणखी सहा महिने तुरुंगावासाची शिक्षा होणार असल्याचेही जिल्हा न्यायालयाने निकाल देताना नमूद केले आहे. या निकालानंतर शिवसेनेच्या गोटात एकच खळबळ माजली आहे. सदानंद थरवळ, शरद गंभीरराव, तात्यासाहेब माने अशी शिक्षा सुनावलेल्या शिवसेनेच्या माजी नगरसेवकांची नावे आहेत.
डोंबिवली पूर्वेकडील एमआयडीसी भागात हभप सावळाराम महाराज म्हात्रे क्रीडासंकुल आहे. पंधरा वर्षांपूर्वी या क्रीडा संकुलात अनधिकृत दुकानांचे गाळे उभारण्यात आल्याची बाब चव्हाट्यावर आली होती. हे दुकान गाळे तोडण्याची कारवाई सुरू असताना या तिन्ही माजी नगरसेवकांनी सरकारी कामात अडथळा आणल्याचा आरोप करण्यात आला होता.
याबाबत तत्कालीन उपायुक्त रविंद्र वाघ यांनी डोंबिवलीच्या रामनगर पोलीस ठाण्यात तक्रार केली होती. याच प्रकरणाची कल्याण जिल्हा व सत्र न्यायालयात शुक्रवारी अंतिम सुनावणी झाली. यावेळी न्यायाधीश एस. एस. गोरवाडे यांनी या माजी नगरसेवकांना दोषी ठरवत दोन वर्षे सक्तमजुरी आणि प्रत्येकी 50 हजार रुपयांचा दंडाची शिक्षा सुनावल्याची माहिती सरकारी वकील ॲड. सचिन कुलकर्णी यांनी दिली. या संदर्भात शिक्षा सुनावलेल्या नगरसेवकांशी संपर्क साधला असता जिल्हा सत्र न्यायायालयाच्या निर्णयाला वरिष्ठ न्यायालयात आव्हान देणार असल्याचे सदानंद थरवळ आणि तात्यासाहेब माने यांनी सांगितले.
हेही वाचले का ?