मुंबई: सायन रुग्णालयात पदव्युत्तर शिक्षण घेणाऱ्या निवासी डॉक्टरने आत्महत्या केल्याची घटना शनिवारी रात्री उघडकीस आली. डॉ. शिवचरण आप्पा पाटील असे त्यांचे नाव असून ते शस्त्रक्रिया विभागात पदव्युत्तर अभ्यासक्रमाच्या प्रथम वर्षात शिकत होते. त्यांचा मृतदेह रुग्णालयाच्या निवासी डॉक्टरांच्या वसतिगृहातील खोलीच्या बाथरूममध्ये आढळला.
भूल देणाऱ्या औषधांच्या अतिमात्रेचा संशय व्यक्त होत असला, तरी मृत्यूचे कारण स्पष्ट झालेले नाही. या प्रकरणी पोलिसांनी अपघाती मृत्यूची नोंद केली असून याबाबत तपास सुरू आहे.
डॉ. पाटील शनिवारी रुग्णालयातील वॉर्डमध्ये कामावर आले नसल्याचे लक्षात आले. त्यांच्याशी संपर्क साधण्याचा प्रयत्न करूनही प्रतिसाद मिळत नसल्याने त्यांच्या रूम पार्टनरला खोलीत जाऊन पाहण्यास सांगण्यात आले.
सहकाऱ्याने फोन केला असता मोबाइलचा आवाज बाथरूममधून ऐकू आला. त्यामुळे संशय आल्याने वरिष्ठांना माहिती देण्यात आली. त्यानंतर बाथरूममध्ये तपासणी केली असता डॉ. पाटील मृतावस्थेत आढळले.
प्राथमिक माहितीनुसार, डॉक्टरांच्या हाताला सलाईन लावलेली होती. घटनास्थळी भूल देण्यासाठी वापरल्या जाणाऱ्या औषधांच्या दोन बाटल्याही आढळल्या. दरम्यान, डॉ. शिवशरणप्पा पाटील यांच्या मृत्यूबद्दल मुंबई महापालिका निवासी डॉक्टर संघटनेने ( मार्ड) दुःख व्यक्त केले आहे.
या घटनेच्या पार्श्वभूमीवर निवासी डॉक्टरांचे दीर्घ ड्युटीचे तास, कामाचा अतिताण आणि अपुरी मनुष्यबळ व्यवस्था याकडे संघटनेने लक्ष वेधले आहे.