Book Reading vs Mobile Use | इंटरनेटच्या युगात वाचन संस्कृतीला बहर!

स्वप्निल कुलकर्णी

Reading Culture In Digital Age

मुंबई : हल्ली पुस्तके वाचतो कोण किंवा मराठी पुस्तकांचे काही खरं नाही, असा सूर नेहमी लावला जातो. मात्र, या सर्व सुरांना वाकुल्या दाखवत दोन महिन्यांच्या उन्हाळा सुट्टीतही बालवाचक, शालेय विद्यार्थ्यांनी काही काळ मोबाइलपासून दूर रहात पुस्तके वाचण्याचा आनंद घेतल्याचे समोर आले. त्यामुळे इंटरनेटच्या युगात वाचन संस्कृतीला बहर मिळत असल्याचे हे चित्र सुखावणारे आहे.

शालेय अभ्यासक्रमापलीकडे विद्यार्थ्यांना वाचनाची गोडी लागावी म्हणून पुस्तक वाचन स्पर्धा, पुस्तक पेटी योजना काही वाचनालयामध्ये राबविली जाते. शालेय, महाविद्यालयीन विद्यार्थ्यांची पुस्तके वाचण्यासाठी महामुंबईतील सार्वजनिक ग्रंथालयात गर्दी होत आहे. त्यांचा मराठी पुस्तकांकडे ओढा कायम असल्याचे दिसून आले आहे, ज्यातून मराठी पुस्तकांचा आलेख चढता ठेवण्यात हातभार लागत आहे. यातूनच ‘मला काय हवं आहे’ या प्रश्नापासून सुरू होणारा वाचन प्रवास ‘जगात काय चाललं आहे’ हे जाणून घेण्यापर्यंत विस्तारतो आहे.

आजची पिढी स्मार्टफोनच्या जमान्यात मोठी होत असली, तरी तिचा अजूनही पुस्तकांशी असलेला संबंध सुटलेला नाही.

तंत्रज्ञानाच्या साह्याने बहुमाध्यमांचा वापर करून एखादा विषय अधिक सोपा करून सांगता येतो हे खरं; परंतु त्यामुळे हे तंत्रज्ञान पुस्तकांची जागा घेऊ शकत नाही, हेही तितकेच खरे असल्याचे चित्र वाचनालयातील पुस्तकांना मिळत असलेल्या प्रतिसादावरून स्पष्ट होते.

महाविद्यालयीन विद्यार्थ्यांना कादंबरी, धार्मिक, आरोग्य, स्पर्धा परीक्षेची पुस्तके यावरील साहित्य आवडते. शालेय विद्यार्थ्यांचा चरित्रात्मक ग्रंथांकडे कल आहे.

मुंबई शहर, उपनगर 58

ठाणे 100

रायगड 62

पालघर 35