Ashadi Ekadashi : तीर्थक्षेत्र पंढरपूरचा आषाढी सोहळा आज (दि. 6) भक्तिमय वातावरणात साजरा होत आहे. संतांच्या पालख्या रात्री तीर्थक्षेत्र पंढरीत दाखल झाल्या आहेत. यंदा आषाढी सोहळ्यासाठी सुमारे 20 लाखांहून अधिक भाविक पंढरीत दाखल झाले आहेत. यामुळे पंढरीनगरी भाविकांनी दुमदुमली आहे. दरम्यान, पंतप्रधान नरेंद्र मोदी यांनी आषाढी एकादशीनिमित्त शुभेच्छा दिल्या आहेत.
पंतप्रधान नरेंद्र मोदी यांनी एक्स पोस्टमध्ये म्हटलं आहे की, आषाढी एकादशीच्या या पवित्र दिनाच्या मनोभावे शुभेच्छा! आपल्यावर विठ्ठलाचे आशीर्वाद सदैव असेच कायम राहोत हीच विठ्ठलाच्या चरणी आपली प्रार्थना आणि कामना. भगवान विठ्ठल आपल्याला आनंदी आणि समृद्धीमय समाजासाठी मार्गदर्शन करत राहो, आणि आपणही गरीब आणि वंचितांची सेवा करत राहू या.
आषाढी यात्रेनिमित्त पंढरपूर येथे लाखोंच्या संख्येने भाविक दाखल झाले आहेत. 5,200 जादा बसेस आषाढीकरिता सोडल्या आहेत. जादा रेल्वे गाड्यादेखील धावत आहेत,खासगी वाहनांनीदेखील भाविक मोठ्या संख्येने आले आहेत. 18 ठिकाणी पार्किंग उभारण्यात आली आहेत. दशमी दिवशी चंद्रभागा वाळवंट, भक्तिसागर 65 एकर, मंदिर परिसर, स्टेशन रोड, भक्तिमार्ग, प्रदक्षिणा मार्ग भाविकांनी फुलून गेला आहे. दर्शन रांग मंदिरापासून पत्राशेडच्या पुढे गोपाळपूर येथून पुढे रांझणी रस्त्यावर 7 कि.मी.पर्यंत गेली आहे. दर्शन रांगेत 4 लाखांहून अधिक भाविक दाखल झालेले आहेत, तर 65 एकर भक्तिसागरात 4 लाखांहून अधिक भाविक वास्तव्य करत आहेत. येथील तूंब, राहुट्यांमध्ये भजन, कीर्तन व प्रवचनात भाविक दंग झाले आहेत.
यंदा भाविकांची संख्या अपेक्षेपेक्षा जास्त वाढली आहे. त्यामुळे दर्शन रांग 7 कि.मी. अंतरावर पोहोचली आहे. दर्शन रांगेतील भाविकांना पदस्पर्श दर्शनासाठी किमान 10 ते 12 तासांचा कालावधी लागत आहे. एका मिनिटाला साधारणपणे 50 भाविकांना पदस्पर्श दर्शन मिळत आहे. तर तासाला 3,000 भाविकांना दर्शन मिळत आहे. आणखी दर्शन रांग पुढे पुढे सरकत चालली आहे; तर मुखदर्शन रांगही मंदिरापासून विठ्ठल अन्नक्षेत्रापासून पुढे संभाजी महाराज पुतळा ते काळा मारुतीपर्यंत जाते. येथूनही पुढे चौफळ्यापर्यंत मुखदर्शन रांग येत आहे. तर मुख दर्शनासाठीदेखील किमान तीन ते चार तासांचा कालावधी लागत आहे.
पंढरपूर नगरपालिका, जिल्हा प्रशासन, तालुका प्रशासन यांच्या वतीने आरोग्यविषयक सेवा बजावण्यात येत आहेत. आरोग्य विभागाच्या वतीने वाखरी, तीन रस्ता, गोपाळपूर दर्शन रांग येथे आरोग्य, तर 65 एकर येथे महाआरोग्य शिबिरे आयोजित करण्यात आली आहेत. येथेही लाखो भाविक औषधोपचाराचा लाभ घेत आहेत. 6 हजार 813 शौचालये, महिला स्नानगृह चार ठिकाणी उभारण्यात आली आहेत. चंद्रभागा स्नान करून श्री विठ्ठल-रुक्मिणीचे दर्शन घेण्यासाठी नामदेव पायरीकडे येणार्या भाविकांमध्ये विठुमाऊलीच्या नामाचा उत्साह दिसून येत आहे.