Mumbai Police Drug Bust
मुंबई, पुढारी वृत्तसेवा : मुंबई पोलिसांनी गोरेगाव पश्चिम येथील लिंक रोड परिसरात अमली पदार्थांविरोधात धडक कारवाई केली आहे. पोलिसांनी तब्‍बल 21 कोटी 13 लाख 48 हजार 500 रुपये किमतीचे कोकेन जप्त केले आहे. फुलचंद्र ईश्वरदयाल कश्यप (वय 31) असे ताब्‍यात घेतलेल्‍या संशयित आरोपीचे नाव आहे. त्‍याने अमली पदार्थ कुठून आणले, कोणाला विक्री केले जाणार होते आणि या रॅकेटमध्ये आणखी कोणाचा सहभाग आहे, याचा पोलिसांकडून तपास सुरू आहे.
फुलचंद्र कश्यप हा अमली पदार्थांची तस्करी करत असल्‍याची गोपनीय माहिती पोलिसांना मिळाली होती. त्‍यानुसार, आरोपीच्या मालाड पश्चिम येथील मढ व्हिलेजमधील राहत्या घराची झडती घेतली. फुलचंद्र कश्यप याच्‍याकडून कोकेन जप्त करण्यात आले आहे.
पोलिसांनी या कारवाईत 4226.97 ग्रॅम म्हणजेच सुमारे 4.2 किलो कोकेन जप्त केले आहे. या प्रकरणी बांगूरनगर पोलीस ठाण्यात NDPS कायद्यानुसार गुन्हा दाखल केला आहे. तपासादरम्यान आरोपीचा साथीदार मुजाहिद अली याचाही गुन्ह्यात सहभाग निष्पन्न झाला आहे.
पोलिसांकडून मुजाहिद अली याला अटक करण्यात आली आहे. दोन्ही आरोपींकडून जप्त केलेल्या कोकेनची एकूण किंमत 21.13 कोटी रुपये आहे. हे कोकेन कुठून आणले, कोणाला विक्री केले जाणार होते आणि या रॅकेटमध्ये आणखी कोणाचा सहभाग आहे, याचा पोलिसांकडून तपास सुरू आहे.