Mumbai Red Alert: मुंबई आणि मुंबई महानगर प्रदेशात मुसळधार पावसाचा धोका लक्षात घेता भारतीय हवामान विभागाने (IMD) रेड अलर्ट जारी केला आहे. पुढील काही तासांत अतिवृष्टीसह ताशी 80 ते 90 किलोमीटर वेगाने जोरदार वारे वाहण्याची शक्यता हवामान विभागाने व्यक्त केली आहे. या पार्श्वभूमीवर नागरिकांनी अत्यावश्यक कामाशिवाय घराबाहेर पडू नये, असे आवाहन प्रशासनाकडून करण्यात आले आहे.
हवामान विभागाच्या इशाऱ्यानंतर राज्य आपत्ती व्यवस्थापन प्राधिकरणाने महत्त्वाचे निर्देश जारी केले आहेत. त्यानुसार, मुंबईतील सर्व खासगी कार्यालयांनी शक्य असेल तेथे कर्मचाऱ्यांना 'वर्क फ्रॉम होम'ची सुविधा द्यावी, असे सांगण्यात आले आहे. मुसळधार पाऊस आणि वाहतुकीवर होणारा परिणाम लक्षात घेता हा निर्णय घेण्यात आला आहे.
याशिवाय, अत्यावश्यक सेवा वगळता सर्व शासकीय आणि निमशासकीय कार्यालयांतील कर्मचाऱ्यांना दुपारनंतर अर्धा दिवसाची सुट्टी जाहीर करण्यात आली आहे. त्यामुळे कार्यालयीन वेळेत होणारी गर्दी कमी होऊन कर्मचाऱ्यांना सुरक्षितपणे घरी पोहोचता यावे, हा या निर्णयामागील उद्देश असल्याचे प्रशासनाने स्पष्ट केले आहे.
दरम्यान, मुंबईत सकाळपासून अनेक भागांत मुसळधार पाऊस सुरू असून काही ठिकाणी पाणी साचणे, झाडे पडणे आणि वाहतुकीचा वेग मंदावल्याच्या घटना समोर आल्या आहेत. पुढील काही तास पावसाचा जोर कायम राहण्याची शक्यता असल्याने नागरिकांनी हवामान विभाग आणि स्थानिक प्रशासनाच्या सूचनांचे पालन करावे, असे आवाहन करण्यात आले आहे.
प्रशासनाने विशेषतः समुद्रकिनारी जाणे टाळावे, अनावश्यक प्रवास करू नये आणि कोणतीही आपत्कालीन परिस्थिती निर्माण झाल्यास तातडीने संबंधित यंत्रणांशी संपर्क साधावा, असेही नागरिकांना सांगितले आहे. परिस्थितीवर मुंबई महानगरपालिका, राज्य आपत्ती व्यवस्थापन प्राधिकरण आणि इतर संबंधित यंत्रणा सातत्याने लक्ष ठेवून आहेत.