मुंबई : मुंबई महानगरपालिकेच्या सत्तेवर बसणाऱ्या भाजप-शिवसेनेच्या गटाची नोंदणी झाल्यामुळे आंगणेवाडी यात्रेनंतर 11 फेब्रुवारीला महापौर निवडणूक घेण्याची तयारी पालिका प्रशासनाने केली आहे. मुख्यमंत्री व उपमुख्यमंत्री यांनी या तारखेवर शिक्कामोर्तब केल्यानंतरच हा मुहूर्त जाहीर होईल.
सिंधुदुर्ग जिल्ह्यातील आंगणेवाडीच्या भराडी देवीची यात्रा सोमवार 9 फेब्रुवारीला असल्यामुळे नगरसेवकांच्या विनंतीनुसार 11 फेब्रुवारी ही तारीख निवडणुकीसाठी निश्चित करण्यात आल्याचे सांगण्यात येत आहे.
मुंबई महापालिका निवडणुकीत भाजपा-शिवसेना महायुतीचे सर्वाधिक नगरसेवक निवडून आले असले तरी समिती सदस्य पदाच्या संख्येवरून काही तांत्रिक अडचणी येत होत्या. त्यामुळे महापालिकेने 31 जानेवारीला ठेवलेली महापौर निवडणूक मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्या आदेशानुसार पुढे ढकलण्यात आली. आता भाजपा व शिवसेनेची गट नोंदणी झाली आहे.
त्यामुळे मंगळवारी भाजपा व शिवसेनेच्या नेत्यांची चर्चा करून, महापौर निवडणुकीसाठी निश्चित करण्यात आलेल्या 11 फेब्रुवारीच्या तारखेवर शिक्कामोर्तब करण्यात येईल. त्यानंतर 18 फेब्रुवारीपर्यंत स्थायी व शिक्षण समिती अध्यक्षपदाची निवडणूक घेण्याचा विचार सुरू आहे.