Mumbai Viral News
मुंबई: आजच्या धकाधकीच्या जीवनात प्रत्येकाला कोणाशी तरी मनमोकळेपणाने बोलायचे असते, पण ऐकून घेणारं कोणी नसतं. सोशल मीडियावरच्या अभासी जगापेक्षा प्रत्यक्षात समोर बसून कोणाकडे तरी दु:ख व्यक्त करावे असे अनेकांना वाटत असते. याच एकाकीपणावर मुंबईतील एका तरुणाने एक अनोखी शक्कल लढवली आहे. मुंबईच्या गजबजलेल्या समुद्रकिनाऱ्यावर बसून लोकांचे दुःख ऐकून घेण्याचा त्याने व्यवसाय सुरू केला असून, सध्या त्याचा व्हिडिओ सोशल मीडियावर तुफान व्हायरल होत आहे.
मुंबईतील एका गजबजलेल्या समुद्रकिनाऱ्यावर या तरुणाने एक लहान टेबल आणि खुर्ची मांडली असून समोर एक रंगीत पाटी लावली आहे. या पाटीवर त्याने वेगवेगळ्या सेवांचे दर लिहिले आहेत, छोट्या समस्या ऐकण्यासाठी २५० रुपये, मोठ्या समस्यांसाठी ५०० रुपये आणि जर तुम्हाला फक्त कोणीतरी तुमच्यासोबत बसून रडावे असे वाटत असेल तर १००० रुपये.
'न्यूज अल्जेब्रा' नावाच्या हँडलवरून शेअर करण्यात आलेल्या या व्हिडिओमध्ये हा तरुण अत्यंत शांतपणे लोकांची वाट पाहत बसलेला दिसतो. जेव्हा त्याला विचारण्यात आले की, लोक खरच पैसे देऊन तुमच्याकडे बोलायला येतात का? त्यावर त्याने हसत "हो" असे उत्तर दिले. तो म्हणतो की, लोकांच तो ऐकून घेतो, शक्य असल्यास सल्ला देतो आणि लोक सहसा थोडे हलके होऊन निघून जातात.
त्याने सांगितले की, त्याने मानसशास्त्र आणि तत्त्वज्ञानाचा अभ्यास केला आहे. तो याकडे केवळ एक व्यावसायिक युक्ती म्हणून पाहत नाही, तर त्याचा या गोष्टीवर विश्वास आहे. त्याची संकल्पना अगदी सोपी आहे, शांत बसा, समोरच्याचे नीट ऐकून घ्या, मध्येच अडथळा आणू नका आणि लोकांना जे बोलायचे आहे ते बोलू द्या.
व्हिडिओ व्हायरल होताच नेटकऱ्यांनी त्यावर विविध प्रतिक्रिया दिल्या आहेत. एका युजरने लिहिले, 'या माणसाने बीचवर सर्वात मोठा बिझनेस सुरू केला आहे. ही एक नवीन कल्पना असल्याचे त्याने म्हटले.' दुसऱ्या एका कमेंटमध्ये म्हटले आहे, "हा तरुण थेरपिस्ट जे काम करतात तेच करत आहे, पण पदवी, वेटिंग लिस्ट आणि तासाला हजारो रुपयांच्या शुल्काशिवाय!"