मुंबई : मध्य, हार्बर आणि पश्चिम अशा तिन्ही रेल्वेमार्गांवर रविवारी मेगाब्लॉक जाहीर करण्यात आला असून लोकलसेवांवर त्याचा मोठा परिणाम होणार आहे. त्यामुळे मुंबईकरांचे मेगा हाल होण्याची शक्यता आहे. रेल्वेने लोकांच्या माहितीसाठी वेळापत्रकही जाहीर केले आहे.
रविवारचा वीकेंड आणि सोमवारी 26 तारखेला प्रजासत्ताक दिनानिमित्त सुट्टी आहे. या जोडून आलेल्या सुट्टीमुळे साहजिकच फिरण्याचे प्लॅनिंग अनेकांनी केले असेल. मात्र मध्य, हार्बर आणि पश्चिम अशा तिन्ही रेल्वेमार्गांवर रविवारी मेगाब्लॉक जाहीर करण्यात आला असल्याने प्रवाशांचे हाल होणार आहेत. रेल्वे प्रशासनाकडून ट्रॅक, सिग्नल आणि ओव्हरहेड वायरच्या देखभालीसाठी हा ब्लॉक घेतला जात असून, या कालावधीत काही लोकल फेऱ्या रद्द राहणार आहेत, तर काही सेवा उशिराने धावणार आहेत.
मध्य रेल्वेवर ब्लॉक
ब्लॉकचा भाग : माटुंगा ते मुलुंड
मार्ग: अप आणि डाऊन जलद
वेळ: सकाळी 11.05 ते दुपारी 3.45
परिणाम : या कालावधीत जलद मार्गावरील लोकल गाड्या धीम्या मार्गावर वळवण्यात येणार आहेत. परिणामी काही लोकल रद्द होणार असून काही फेऱ्या वेळापत्रकापेक्षा उशिरा धावतील.
हार्बर रेल्वेवर ब्लॉक
ब्लॉकचा भाग : सीएसएमटी ते चुनाभट्टी / वांद्रे
मार्ग: अप आणि डाऊन
वेळ: सकाळी 11.40 ते दुपारी 4.40
परिणाम : सीएसएमटी-वाशी, सीएसएमटी-बेलापूर, सीएसएमटी-पनवेल तसेच सीएसएमटी-वांद्रे/गोरेगाव मार्गावरील अनेक लोकल सेवा रद्द राहतील. प्रवाशांच्या सोयीसाठी पनवेल ते कुर्ला (फलाट क्रमांक 8) दरम्यान दर 20 मिनिटांनी विशेष लोकल चालवण्यात येईल.
पश्चिम रेल्वेवर ब्लॉक
ब्लॉकचा भाग : अंधेरी ते गोरेगाव
वेळ: सकाळी 10 ते दुपारी 3
पश्चिम रेल्वे (हार्बर मार्ग) ब्लॉक
ब्लॉकचा भाग: माहीम ते अंधेरी
मार्ग: अप आणि डाऊन
वेळ: सकाळी 11 ते दुपारी 4
परिणाम : या वेळेत चर्चगेट-गोरेगाव, सीएसएमटी-वांद्रे तसेच हार्बर मार्गावरील अनेक अप-डाऊन लोकल सेवा रद्द राहणार आहेत.