मुंबई: मुंबईत बॉम्बस्फोटाच्या बनावट धमक्यांचे प्रमाण वाढत असून, या प्रकरणांमुळे मुंबई पोलिसांसमोर नवे तांत्रिक आव्हान उभे राहिले आहे. सायबर गुन्हेगार व्हर्च्युअल प्रायव्हेट नेटवर्क, एन्क्रिप्टेड ई-मेल सेवा आणि इतर गोपनीय डिजिटल साधनांचा वापर करून ओळख लपवत असल्याने आरोपींपर्यंत पोहोचणे अधिक कठीण बनले आहे.
गेल्या काही महिन्यांत विमानतळ, शाळा, महाविद्यालये, सरकारी कार्यालये, दूतावास आणि विविध सार्वजनिक ठिकाणांना बॉम्बची धमकी देणारे अनेक ई-मेल प्राप्त झाले आहेत. या सर्व धमक्या खोट्या ठरल्या असल्या तरी प्रत्येक संदेशाची पडताळणी करणे आणि सुरक्षा यंत्रणा तैनात करणे पोलिसांसाठी बंधनकारक असल्याने मोठ्या प्रमाणावर मनुष्यबळ आणि संसाधने खर्ची पडत आहेत.
तपासात असे आढळून आले आहे की, अनेक आरोपी व्हीपीएनच्या माध्यमातून आपला इंटरनेट प्रोटोकॉल पत्ता लपवतात. त्याचबरोबर एन्क्रिप्टेड ई-मेल सेवा आणि परदेशातील सर्व्हरचा वापर करून संदेश पाठवले जात असल्याने त्यांचा माग काढण्यासाठी आंतरराष्ट्रीय सहकार्याची आवश्यकता भासत आहे.
प्रत्येक धमकीनंतर बॉम्ब शोधक व नाशक पथक , स्थानिक पोलिस, गुन्हे शाखा आणि इतर सुरक्षा यंत्रणा घटनास्थळी पोहोचून संपूर्ण परिसराची तपासणी करतात. त्यामुळे वाहतूक विस्कळीत होणे, नागरिकांमध्ये भीतीचे वातावरण निर्माण होणे आणि सरकारी यंत्रणांवर अतिरिक्त ताण येणे, असे परिणाम दिसून येत आहेत.
मुंबई पोलिसांनी नागरिकांना अफवांवर विश्वास न ठेवण्याचे आणि संशयास्पद ई-मेल किंवा संदेशांची माहिती तात्काळ पोलिसांना देण्याचे आवाहन केले आहे.