मुंबई : महाराष्ट्र नवनिर्माण सेनेचा गुढी पाडवा मेळावा गुरुवारी दादर येथील छत्रपती शिवाजी महाराज मैदानात आयोजित करण्यात आला असून या मेळाव्याला मनसेचे अध्यक्ष राज ठाकरे मार्गदर्शन करणार आहेत.
मुंबई महानगरपालिका निवडणुकीनंतर पक्षाचा हा पहिलाच मेळावा असल्याने राज ठाकरे यावेळी काय बोलतात याकडे सर्वांचे लक्ष लागून आहे.
राज्यात बंद पडणाऱ्या मराठी शाळा, इंग्रजी शाळांच्या संख्येत झालेली वाढ, मुंबई महानगरपालिकेचा आजही इंग्रजीत सुरू असलेला कारभार, अशा कळीच्या मुद्यांवर राज ठाकरे पुन्हा आपली भूमिका मांडतील आणि महाराष्ट्र सैनिकांना नवा कार्यक्रम देतील अशी अपेक्षा व्यक्त केली आहे. मनसेच्या वर्धापनदिनानिमित्त रायगडावरून सदस्य नोंदणीला सुरुवात झाली. त्या अनुषंगाने पक्ष विस्ताराचाही अजेंडा या सभेत अपेक्षित आहे.
काही दिवसांपूर्वीच राज ठाकरे यांनी उपमुख्यमंत्री एकनाथ शिंदे यांची भेट घेतली होती. या भेटीबाबतही राज ठाकरे काय भाष्य करतात याबाबत राजकीय वर्तुळात चर्चा आहे.