Mira-Bhayandar news Car airbag death
मिरा-भाईंदर : प्लेजंट पार्क परिसरात एक धक्कादायक घटना समोर आली आहे. गाडीतील एअरबॅग अचानक उघडल्याने एका २५ वर्षीय युवकाचा मृत्यू झाला आहे. मोहित सोनी (वय २५) असे मृत युवकाचे नाव असून, या घटनेमुळे परिसरात हळहळ व्यक्त केली जात आहे.
प्राथमिक माहितीनुसार, गाडी चालवत असताना अचानक एअरबॅग अनपेक्षितपणे उघडली. या घटनेत मोहितच्या मानेला गंभीर दुखापत झाली. त्यानंतर त्याची प्रकृती खालावल्याने त्याला तातडीने रुग्णालयात दाखल करण्यात आले; मात्र उपचारादरम्यान त्याचा मृत्यू झाला.
घटनेची माहिती मिळताच पोलिसांनी घटनास्थळी धाव घेत पंचनामा केला. मोहित सोनीच्या मृत्यूमागील नेमके कारण काय, गाडीतील एअरबॅग कशामुळे उघडली आणि या घटनेमागे काही तांत्रिक बिघाड आहे का, याचा तपास पोलिसांकडून सुरू आहे. वैद्यकीय अहवाल, तांत्रिक तपासणी आणि इतर पुराव्यांच्या आधारे पुढील चौकशी करण्यात येत असून, अधिक तपशीलाची प्रतीक्षा आहे.