मुंबई: मुंबई क्रिकेट असोसिएशनने (एमसीए) आझाद, क्रॉस मैदानांवर प्रस्तावित दसरा मेळाव्यासाठी ना हरकत प्रमाणपत्र (एनओसी) देण्यास नकार दिला आहे. नियोजित सामने आणि मैदानाचे नुकसान होण्याची शक्यता ही कारणे आहेत.
शिवसेना शिंदे गटाने यंदाचा दसरा मेळावा आयोजित करण्यासाठी आझाद आणि क्रॉस मैदान मिळावे, अशी विनंती मुंबई महापालिकेला केली आहे.
दोन्ही मैदाने १८ ते २० ऑक्टोबर या कालावधीत क्रिकेट सामन्यांसाठी आधीच आरक्षित असल्याने मुंबई क्रिकेट असोसिएशनने आझाद मैदान आणि क्रॉस मैदानावर प्रस्तावित दसरा मेळाव्याला विरोध दर्शविला आहे.
आझाद आणि क्रॉस मैदाने नियोजित सामने, स्पर्धा आणि इतर क्रिकेटविषयक उपक्रमांसाठी निश्चित करण्यात आली आहेत, त्यामुळे प्रस्तावित कार्यक्रमासाठी ना हरकत प्रमाणपत्र देणे शक्य नाही, असे एमसीएने राज्य क्रीडा विभागाचे प्रधान सचिव रणजित सिंह देओल यांना २१ सप्टेंबर रोजी लिहिलेल्या पत्रात म्हटले आहे.
मोठ्या सार्वजनिक कार्यक्रमांमुळे खेळपट्ट्या (पिचेस), आऊटफील्ड्स आणि सरावाच्या जागांचे नुकसान होऊ शकते. अवजड वाहनांची ये-जा, तात्पुरत्या स्वरूपाची बांधकामे आणि लोकांची मोठी गर्दी यामुळे मैदानाची पूर्ववत दुरुस्ती करणे वेळखाऊ आणि खर्चिक ठरू शकते, अशी भीतीही क्रिकेट असोसिएशनने व्यक्त केली आहे.
मेळाव्यासाठी ठिकाण निश्चित नाही
दरम्यान, दसरा मेळाव्यासाठी कार्यक्रमाचे ठिकाण अद्याप निश्चित झालेले नाही, असे शिवसेना शिंदे गटातर्फे सांगण्यात आले आहे. दसरा मेळाव्यासाठी आम्ही काही मैदाने किंवा ठिकाणांसाठी अर्ज केले आहेत.
आझाद मैदान, क्रॉस मैदान, तसेच वरळी डोम आणि गोरेगाव एक्झिबिशिन सेंटर यांचा समावेश आहे. पाऊस आणि इतर बाबींचा विचार करून अंतिम ठिकाण निश्चित केले जाईल, असे शिवसेनेचे प्रवक्ते अरुण सावंत यांनी सांगितले.
मुंबई क्रिकेट असोसिएशनकडून क्रिकेटसाठी नियमितपणे वापरल्या जाणाऱ्या मैदानांवर भविष्यात खेळाव्यतिरिक्त इतर कार्यक्रमांसाठी एक व्यापक धोरण किंवा प्रणाली असावी, अशी मागणी एमसीएने केली आहे. एमसीएने आझाद आणि क्रॉस मैदान या क्रीडा स्थळांचे जतन, देखभालीसाठी सातत्याने प्रयत्न केले आहेत. क्रिकेटच्या आयोजनासाठीच नव्हे, तर शहराचा महत्त्वाचा क्रीडा वारसा जपण्यासाठीही या मैदानांचे अनावश्यक नुकसानापासून संरक्षण करणे आवश्यक आहे. त्यामुळे, आम्ही आपल्या हस्तक्षेपाची अपेक्षा करतो आणि प्रस्तावित दसरा मेळाव्यासाठी दिलेल्या परवानगीचा पुनर्विचार करावा, अशी विनंती करतो.- प्रा. डॉ. उन्मेष खानविलकर, सचिव, एमसीए