मुंबई: राज्यात दुष्काळसदृश परिस्थितीच्या पार्श्वभूमीवर इतर जिल्ह्यांच्या तुलनेने छत्रपती संभाजीनगर, जालना, नाशिक आणि अहिल्यानगर या चार जिल्ह्यांमध्ये जादा पाणी टंचाई आहे. पाणीपुरवठा मंत्री गुलाबराव पाटील म्हणाले, राज्यात पाण्याची मागणी वाढली आहे.
मागणीनुसार टँकरद्वारे पाणीपुरवठा सुरू आहे. छत्रपती संभाजीनगर, जालना, नाशिक आणि अहिल्यानगर या चार जिल्ह्यांमध्ये जवळपास ७०० च्या आसपास टँकर सुरू आहेत.
छत्रपती संभाजीनगर जिल्ह्यात सर्वाधिक २५४ गावे आणि १,२९९ वाड्यांना २७८ टँकरद्वारे पाणीपुरवठा सुरू आहे. जळगाव जिल्ह्यात १६९ टँकरद्वारे १६० गावे आणि ९३० वाड्यांना, तर अहिल्यानगर जिल्ह्यात १४६ टँकरद्वारे १४८ गावे आणि ९६७ वाड्यांना पाणीपुरवठा केला जात आहे. धाराशिव जिल्ह्यात १६६ टँकर सुरू आहेत.
सांगली, सातारा व सोलापूर जिल्ह्यांतही टँकरने पाणीपुरवठा केला जात आहे. उपलब्ध पाण्याचा योग्य वापर करण्यासाठी शासनाकडून पावले उचलली जात आहेत. विभागीय स्तरावर आढावा घेतल्यानंतर मतदारसंघांनुसार बैठका सुरू करण्यात आल्या आहेत.