मुंबई: राज्यात विधान परिषदेच्या 9 जागांसाठी होणाऱ्या निवडणुकीत शिवसेनेकडून दोन चेहऱ्यांना संधी मिळणार असून उपमुख्यमंत्री एकनाथ शिंदे हे धक्कातंत्राचा वापर करण्याची चिन्हे दिसत आहेत.
पक्षात डझनभर नेते इच्छुक असताना शिंदे यांनी प्रहार संघटनेचे अध्यक्ष बच्चू कडू यांना शिवसेना कोट्यातून विधान परिषदेवर जाण्याची ऑफर दिल्याचे समजते. येत्या 12 मे रोजी विधान परिषदेच्या 9 जागांसाठी निवडणूक होणार आहे. शिवसेना आमदारांचे संख्याबळ पाहता त्यांचे दोन उमेदवार विधान परिषदेवर निवडून येऊ शकतात.
विधान परिषदेच्या माजी उपसभापती डॉ. नीलम गोऱ्हे, माजी आमदार कॅप्टन अभिजित अडसूळ, माजी खासदार संजय मंडलिक, शिवसेना सचिव भाऊसाहेब चौधरी ही नावे चर्चेत आहेत. गोऱ्हे यांची वर्णी निश्चित मानली जात असली तरी दुसऱ्या नावाबाबत शिंदे पक्षातील इच्छुकांना धक्का देण्याच्या तयारीत आहेत.