मुंबई : कांदिवलीतील एटीएम सेंटरमध्ये कॅश भरण्यासाठी आलेल्या कर्मचाऱ्यासह गार्डला गुंगारा देऊन सुमारे 63 लाखांची रोख रक्कम एका कर्मचाऱ्याने चोरी करुन पलायन केले होते. याप्रकरणी चोरीचा गुन्हा दाखल होताच अवघ्या सहा तासांत कांदिवली पोलिसांनी आरोपी कर्मचारी सुशांत दीपक कासारे त्याला मदत करणारा सुफियान रज्जबअली याला अटक केली.
या दोघांकडून पोलिसांनी गुन्ह्यातील कारसह 62 लाखांची रोख रक्कम हस्तगत केली आहे. अटकेनंतर दोघांनाही बोरिवलीतील स्थानिक न्यायालयाने पोलीस कोठडी सुनावली आहे.
सीएसएम इन्फोसिस्टम लिमिटेड या कंपनीकडे काही बँकेतील एटीएममध्ये कॅश भरण्याची जबाबदारी देण्यात आली आहे. या कंपनीचे काही कर्मचारी 21 एप्रिलला रात्री पावणेदहा वाजता कांदिवलीतील एम. जी रोड, राजकिरण सोसायटीमध्ये असलेल्या ॲक्सिस बँकेच्या एटीएममध्ये कॅश भरण्यासाठी आले होते.
यावेळी कॅश वाहून नेणाऱ्या कर्मचाऱ्याने इतर गार्ड आणि कर्मचाऱ्यांना गुंगारा देऊन कॅश व्हॅनमधील पैशांने भरलेल्या दोन बॅग चोरी करुन पलायन केले होते.