मुंबई : जोगेश्वरीतील एका फ्लॅटमध्ये डी. एन नगर पोलिसांच्या एका विशेष पथकाने कारवाई करुन 800 ग्रॅम वजनाचे सुमारे 40 लाखांचा एमडी ड्रग्जचा साठा जप्त केला आहे. विक्रीसाठी ड्रग्ज घरी ठेवणाऱ्या फौजानअली अहमद तिकिटवाला या 33 वर्षांच्या आरोपीस पोलिसांनी अटक केली.
त्याच्याविरुद्ध एनडीपीएस कलमांतर्गत गुन्हा नोंदविण्यात आला असून याच गुन्ह्यांत तो सध्या पोलीस कोठडीत आहे. त्याचा मित्र जुनैद याला पोलिसांनी पाहिजे आरोपी दाखविले असून तोच या ड्रग्ज कटातील मुख्य आरोपी असल्याचे पोलिसांनी सांगितले. जोगेश्वरी येथे राहणाऱ्या फौजानअलीकडे एमडी ड्रग्जचा साठा असून त्याची तो विक्री करण्याच्या तयारीत असल्याची माहिती पोलिसांना मिळाली होती.
या माहितीनंतर वरिष्ठ पोलीस निरीक्षक राजेंद्र मचिंदर यांच्या पथकातील पोलीस निरीक्षक गितांजली बाबर, एपीआय सुनीत घाडगे, पोलीस अंमलदार संजय हळदे, बिपीन गायकवाड, विनोद गायकवाड, मंगेश चव्हाण, रांजणे, बाबर, पांढरे, प्रधान, चंद्रकला गारे याीं मेमन कॉलनीतील फौजानअलीच्या घरी छापा टाकला होता. या कारवाईत पोलिसांनी 40 लाखांचा 800 ग्रॅम वजनाचे एमडी ड्रग्ज जप्त केले होते.
चौकशीत त्याला ते ड्रग्ज जुनैद नावाच्या त्याच्या मित्राने दिले होते. तो त्याच्यासाठी एमडी ड्रग्जची विक्री करत होता. या विक्रीतून आलेली रक्कम त्याला पाठवत होता. त्यासाठी त्याला प्रत्येक कामासाठी ठराविक रकमेचे कमिशन मिळत होते. तपासात आलेल्या या माहितीनंतर या दोघांविरुद्ध पोलिसांनी एनडीपीएस कलमांतर्गत गुन्हा दाखल केला होता. याच गुन्ह्यात रात्री उशिरा फौजानअलीला पोलिसांनी अटक केली, तर जुनैदचा पोलीस शोध घेत आहेत. अटकेनंतर त्याला शुक्रवारी दुपारी अंधेरीतील स्थानिक न्यायालयाने पोलीस कोठडी सुनावली आहे.