मुंबई: विक्रमी वर्दळीच्या दादर स्थानकावरील भार हलका व्हावा म्हणून मध्य आणि पश्चिम रेल्वे कॉरिडॉरला जोडणारा नवा प्लॅटफॉर्म उभारण्यात येणार आहे. पाचव्या आणि सहाव्या मार्गिकेच्या विस्तार प्रकल्पाचाच हा एक भाग असेल.
पिक अवरमध्ये अधिकाधिक लोकल गाड्या धावणे शक्य व्हावे म्हणून हा मार्गिकेचा विस्तार केला जाणार आहे. या प्रकल्पासाठी पश्चिम बाजूने भूसंपादन कधीच सुरू झाले आहे. खासकरून दळवी नगर भागातील 46 अतिक्रमणे त्यासाठी निश्चित केली असून तेथील बहुतांश रहिवाशांना जागा रिकामी करण्याच्या नोटीसा बजावण्यात आल्या आहेत.
यातील काही अतिक्रमणे हटवण्याचे प्रयत्न कायदेशीर कचाट्यात अडकले आहेत. बहुतांश अतिक्रमणांचा प्रश्न पुनर्वसन प्रकल्पातून मार्गी लावला जाईल असे दिसते. त्यातून अनेक अतिक्रमीत बांधकामे पाडली गेली आहेत.
दादर स्थानकावर नवा प्लॅटफॉर्म बांधला गेला तर पश्चिम आणि मध्य रेल्वेदरम्यान उपनगरी गाड्या वेगवेगळ्या करण्याचे व्यवस्थापन सुधारेल. यामुळे लोकल गाड्यांची कोंडी करणारी ठिकाणे कमी होऊन लोकल गाड्यांचे वेळापत्रकही सुधारेल.
पिक अव्हरमध्ये कोणताही गोंधळ होणार नाही. दादरच्या नव्या प्लॅटफॉर्मच्या निमित्ताने या स्थानकातील सर्वच प्लॅटफॉर्मचे नंबरही बदलतील आणि प्रवाशांना इच्छित प्लॅटफॉर्मवर जाणे किंवा आपली गाडी सहज गाठणे शक्य होईल.