Nanded Sambhajinagar highway accident
चारठाणा : नांदेड–छत्रपती संभाजीनगर राज्य महामार्गावरील पिंपरी गीतेजवळ स्कार्पिओ वाहन पलटी होऊन झालेल्या अपघातात तिघेजण गंभीर जखमी झाले. जखमींवर चारठाणा प्राथमिक आरोग्य केंद्रात प्रथमोपचार करून पुढील उपचारासाठी जालना येथे हलविण्यात आले.
याबाबत मिळालेल्या माहितीनुसार, मंठा येथून नांदेडकडे लग्न समारंभासाठी जाणारी स्कार्पिओ (क्रमांक एमएच 45 ए क्यू 9504) बुधवारी (दि. ११) दुपारी सुमारे १२ वाजण्याच्या सुमारास चारठाण्यापासून चार किलोमीटर अंतरावरील पिंपरी गीतेजवळील पुलाजवळ आली असता चालकाचा वाहनावरील ताबा सुटला. त्यानंतर वाहनाने अनेक पलट्या घेतल्या.
या वाहनात चालकासह पाच जण प्रवास करत होते. त्यापैकी शोहिद शरीफ आकार (वय २२), आबिद गणी शेख (वय २३) व अरबाज कुरेशी (वय २३, सर्व रा. मंठा) हे गंभीर जखमी झाले. अपघाताची माहिती मिळताच त्यांना तात्काळ चारठाणा येथील प्राथमिक आरोग्य केंद्रात दाखल करण्यात आले. तेथे वैद्यकीय अधिकाऱ्यांनी प्राथमिक उपचार केल्यानंतर पुढील उपचारासाठी जालना येथे हलविले.
दरम्यान, अन्य दोघांना किरकोळ दुखापत झाली असून अपघाताबाबत पुढील तपास सुरू आहे.