Nanded Railway Mineral Scam
उमरखेडः वर्धा–यवतमाळ–नांदेड रेल्वे प्रकल्पातील गौण खनिजाचे अवैध उत्खनन प्रकरणाचा तपास आर्थिक गुन्हे शाखेकडे नुकताच देण्यात आला. या पाठोपाठ यवतमाळच्या जिल्हाधिका-यांना माहितीसह दिनांक 26 नोव्हेंबर 2025 रोजी दुपारी 12.30 वाजता महाराष्ट्र विधानमंडळ सचिवालय येथे उपस्थित राहण्याचे आदेश विधानसभा उपाध्यक्ष अण्णा बनसोडे यांनी दिले आहेत.
सविस्तर अहवाल देण्याचे आदेश दिल्यानंतरही प्रशासनाने टाळाटाळ केल्याने हा विषय आता मेरीटवर घेण्यात आला आहे. एकाबाजुने आर्थीक गुन्हे शाखेचा तपास तर दुसरीकडे स्वता विधानसभा उपाध्यक्ष लक्ष केन्द्रीत करीत असल्यामुळे दोषी अधिकारी तसेच कंत्राटदारांचे धाबे दणाणले आहे.
वर्धा–यवतमाळ–नांदेड रेल्वे प्रकल्पातील गौण खनिज भ्रष्टाचार प्रकरणाची सुनावणी विधानसभा उपाध्यक्षांच्या दालनात सुरु आहे. सदर प्रकरणात जिल्हाधिका-यांना सविस्तर अहवाल एका महिण्याच्या आत सादर करण्याचे आदेश देण्यात आले होते. अहवाल सादर होऊ नये तसेच प्रकरण दडपण्यासाठी काही दोषी अधिकारी तसेच कंत्राटदारांनी मिळून विधानसभा उपाध्यक्ष यांच्या खाजगी सचिवासोबत साटेलोटे केले. याबाबत माहिती मिळताच अमोल कोमावार यांनी सविस्तर तक्रार उपाध्यक्ष अण्णा बनसोडे यांचेकडे दिली. या तक्रारीची गंभीर दखल घेत खाजगी सचिव संतोष परदेशी यांची प्रतिनियुक्ती रद्द करण्यात आली. त्यापाठोपाठ सदर प्रकरणाची चौकशी पोलीस आयुक्त, आर्थिक गुन्हे शाखा, मुंबई यांना देण्यात आली. विधानसभा उपाध्यक्षांनी हे प्रकरण मेरीटवर घेतल्याने चौकशीला वेग आला आहे.
हातकड्या लागण्याची भीती !
यवतमाळ रेल्वे लाईनवरील मुरुम व गौण खनिज सब कंत्राटदारांनी महसूल अधिकाऱ्यांशी संगनमत करून खुले बाजारात विकले. हा घोटाळा जवळपास १२ हजार कोटी रुपयांचा आहे. एकून ३३ किमी पैकी केवळ ५ किमी क्षेत्राचीच ईटीएस मोजणी झाली. काही कंत्राटदारांना लाखो रुपयांचा दंड झाला आहे. ईटीएस मोजणी झाल्यास कोट्यवधी रुपयांचे घबाड समोर येणार असून अनेक दोषी अधिकारी आणि कंत्राटदारांना हातकड्या लागण्याची शक्यता वर्तविण्यात येत आहे.
पुसद, उमरखेड घोटाळ्यावर बैठक!
वर्धा यवतमाळ नांदेड रेल्वे प्रकल्पात पुसद तसेच उमरखेड तालुक्यात अवैधरित्या प्रचंड गौण खनीज उत्खनन करण्यात आले. अकरा महिण्यापासून तक्रारी केल्या जात असतांनाही ईटीएस मोजणी करण्यात आली नाही. याउलट थातुरमातुर खोटा चौकशी अहवाल अतिरिक्त जिल्हाधिकारी यांनी विधानसभा उपाध्यक्षांकडे पाठविला असा अमोल कोमावार यांचा आरोप आहे. सदर प्रकरणी विशेष बैठक विधानसभा उपाध्यक्षांनी 26 नोव्हेंबर रोजी दुपारी 2.30 वाजता लावली असून संपुर्ण माहितीसह उपस्थित राहण्याच्या सुचना जिल्हाधिकारी यवतमाळ यांना देण्यात आल्या आहे.