Two bikes collide head-on, one killed, three seriously injured
देगलूर, पुढारी वृत्तसेवा
दोन दुचाकी वाहनांची समोरासमोर धडक होऊन झालेल्या अपघातात एका दुचाकीवरील गंजगाव ता. बिलोली येथील युवक जागीच ठार झाला, तर इतर तीनजण गंभीर जखमी झाले आहेत. अपघातातील जखमींना देगलूर उपजिल्हा रुग्णालयात प्रथमोपचार केल्यानंतर त्यांना पुढील उपचारासाठी नांदेडला हलविण्यात आले आहे. ही घटना गुरुवारी दि. १५ रोजी दुपारी शेवाळा थडीहिप्परगा या रोडवर घडली.
या संदर्भात पोलीस सूत्रांकडून हाती आलेली माहिती अशी की, गंजगाव ता. बिलोली येथील युवक मोटरसायकलवरून देगलूर कडे येत होते. तर दुसरी मोटरसायकल देगलूरवरुन शेवाळा मार्गे बिलोलीकडे जात होती. दोन मोटरसायकलची शेवाळा- थडी हिप्परगा या रोडवर समोरासमोर धडक झाली.
या अपघातात गंजगाव ता. बिलोली येथील युवक हणमंत मारुती डुबुकवाड (वय ३१) हा जागीच ठार झाला. तर माधव सायलू वन्नलवाड (वय ३०), रा. गंजगाव, शेख शोएब अजीम (वय २२) रा. रंगलरोड देगलूर, शेख उमरपाशा (वय २४), रा.नरंगलरोड देगलुर हे तीनजण गंभीर जखमी झाले आहेत.
या जखमींवर देगलूर उपजिल्हा रुग्णालयात प्राथमिक उपचार केल्यानंतर त्यांना पुढील उपचारासाठी नांदेडला हलविण्यात आले असून, या प्रकरणी देगलूर पोलिस स्टेशनमध्ये रात्री उशिरा गुन्हा नोंद करण्यात आला.