Woman dies due to excessive drinking Umri
उमरी : उमरी पोलीस स्टेशन आणि न्यायालयाच्या समोर असलेल्या वस्तीतील एका महिलेचा अतिमद्य प्राशन केल्याने मृत्यू झाल्याची घटना सोमवारी (दि.२१) राञी साडेअकरा वाजता उघडकीस आली.
या प्रकरणी उमरी पोलीस ठाण्यात आकस्मिक मृत्यूची नोंद करण्यात आली असून या संदर्भात पोलिसांनी दिलेली माहिती अशी की, 20 एप्रिल रोजी दिवसभर आणि रात्री दारू व सिंधी पिल्याने अंजली कृष्णा भंडरवाड (वय 25, रा. मुदखेड हल्ली मुक्काम उमरी) ही महिला घरात बेशुद्ध अवस्थेत आढळली.
या प्रकरणी पोलीस आणि नातेवाईकांनी सदर महिलेला सोमवारी राञी उमरीच्या ग्रामीण रूग्णालयात दाखल केले असता तेथील वैद्यकीय अधिकाऱ्यांनी त्या महिलेला मृत घोषित केले.
या प्रकरणी उमरी पोलीस ठाण्यात आकस्मिक मृत्युची नोंद करण्यात आली. पोलीस निरीक्षक जयप्रकाश गुट्टे यांच्या मार्गदर्शनाखाली पोलीस उपनिरिक्षक पोपुलवाड अधिक तपास करीत आहेत.
अतिमद्य प्राशन केल्याने महिलेचा मृत्यू झाल्याचा प्राथमिक अंदाज असला तरी पोस्टमार्टम रिपोर्ट आल्यानंतर मृत्युचे खरे कारण स्पष्ट होईल असेही पोलिसांनी सांगितले आहे. मंगळवारी सायंकाळी ग्रामीण रुग्णालयात शवविच्छेदन करण्यात आले. परंतु, सायंकाळी सहा वाजेपर्यंत नातेवाईकांनी महिलेचा मृतदेह ताब्यात घेतला नव्हता.