Kinwat Illegal Liquor Raid
किनवट : किनवट पोलीस ठाण्याच्या हद्दीत शुक्रवारी (दि.१७) राबविण्यात आलेल्या मास रेड मोहिमेत अवैध दारू निर्मिती व विक्रीविरोधात धडक कारवाई करण्यात आली. या कारवाईत बोधडी खुर्द येथे अवैध दारूभट्टी उद्ध्वस्त करण्यात आली, तर गंगानगर येथे किराणा दुकानातून देशी दारूची विक्री करणाऱ्यावर गुन्हा दाखल करण्यात आला.
पोलिसांनी दिलेल्या माहितीनुसार, बोधडी खुर्द येथील तारुसिंग सखाराम कटारे उर्फ तारोमास (वय ४५) हा स्वतःच्या अंगणात मोहफुलाच्या रसायनापासून अवैध दारू तयार करत असल्याचे आढळून आले. पोलिसांनी कारवाई करून सुमारे ६०० लिटर मोहफुलाचे रसायन जप्त केले असून त्याची किंमत ३६ हजार रुपये आहे.
या प्रकरणी तारुसिंग कटारे याच्याविरुद्ध महाराष्ट्र दारूबंदी कायद्यातील कलम ६५ (ई) व (फ) अंतर्गत किनवट पोलीस ठाण्यात गुन्हा क्रमांक १७३/२०२६ दाखल करण्यात आला आहे. पुढील तपास पोलीस निरीक्षक गणेश कराड यांच्या मार्गदर्शनाखाली पोलीस हवालदार सिद्धार्थ वाघमारे करीत आहेत.
दरम्यान, गंगानगर येथे स्वस्तिक दयानंद आडे (वय २६) हा आपल्या किराणा दुकानातून देशी दारूच्या बाटल्यांची अवैध विक्री करताना आढळून आला. पोलिसांनी त्याच्याकडून ९० मिली क्षमतेच्या ‘बॉबी संत्रा’ देशी दारूच्या २१ बाटल्या जप्त केल्या असून, जप्त मुद्देमालाची किंमत ८४० रुपये आहे.
या प्रकरणी स्वस्तिक आडे याच्याविरुद्ध महाराष्ट्र दारूबंदी कायद्यातील कलम ६५ (ई) अन्वये गुन्हा क्रमांक १७४/२०२६ दाखल करण्यात आला आहे.
किनवट परिसरात अवैध दारू किंवा अन्य बेकायदेशीर व्यवसाय सुरू असल्यास नागरिकांनी तातडीने पोलिसांना माहिती द्यावी. यासाठी ८८८८८१३६४९ या मोबाईल क्रमांकावर संपर्क साधण्याचे आवाहन पोलीस निरीक्षक गणेश कराड यांनी केले आहे.