लातूर : राष्ट्रवादीचे प्रदेशाध्यक्ष सुनिल तटकरे यांच्यासमोर छावा संघटनेच्या कार्यकत्यांनी रविवारी (दि.२०) सायंकाळी पत्ते फेकल्याने जोरदार राडा झाला होता. यावेळी राष्ट्रवादीच्या कार्यकर्त्यांनी निवेदन देणाऱ्या छावा संघटनेचे प्रदेशाध्यक्ष विजयकुमार घाडगे पाटील यांना बेदम मारहाण झाली होती. यांच्यावर लातूर येथील अपोलो रुग्णालयात उपचार सुरू असून सुरवातीला त्याच्यावर जनरल वार्डमध्ये उपचार सुरु होते. पण घाडगे त्यांच्या छातीत तीव्र वेदना होत असल्याने त्यांना अतिदक्षता विभागात हलवण्यात आले असल्याची माहिती त्यांच्यावर उपचार करणारे डॉ. मनोज कदम यांनी दिली.
मारहाण झाल्यानंतर घाडगे यांना अपोलो रुग्णालयात दाखल करण्यात आले होते. त्यावर तेथील एका रुममध्ये उपचार सुरू होते. तथापि सोमवारी दुपारी त्यांना श्वाच्छोश्वासाचा त्रास होत असल्याने व त्यांच्या छातीत दुखत असल्याने खबरदारी म्हणून अतिदक्षता विभागात हलवण्यात आले आहे. त्यांचे डोके भुवयां व डोक्याला मार लागला आहे. शिवाय बरगड्या व पाठीच्या मणक्यालाही दुखापत झाली आहे. मान , चेहऱ्यावर सुज आली असून आम्ही योग्य ते उपचार करीत असल्याचे डॉ. जाधव यांनी सांगितले.
कृषिमंत्री माणिकराव कोकाटे यांचा विधीमंडळ संभागृहात रमी खेळत असल्याचा व्हिडिओ रविवारी (दि.२० ) व्हायरल झाल्याने मोठी खळबळ उडाली होती. या घटनेच्या निषेधार्थ छावा शेतकरी संघटनेचे कार्यकर्ते लातूर येथे राष्ट्रवादीचे प्रदेशाध्यक्ष सुनिल तटकरे यांची पत्रकार परिषदेत पोहचले व त्यांच्या अंगावर पत्ते फेकले होते. यामुळे राष्ट्रवादीचे संघटनेच्या कार्यकर्त्यांनी घाडगे यांना बेदम मारहाण केली. राष्ट्रवादी काँग्रेस युवक प्रदेशाध्यक्ष सुरज चव्हाण यांचा पुढाकार होता. यात घाडगे गंभीर जखमी झाले होते.