Sanjay Bansode vs Babasaheb Patil
संग्राम वाघमारे
चाकूर : दुष्काळ जाहीर झाल्यानंतर राज्य सरकारचे आभार मानणारे आमदार संजय बनसोडे यांचे बॅनर चर्चेत आले असतानाच, या बॅनरवर सहकार मंत्री बाबासाहेब पाटील यांचा फोटो नसल्याने राजकीय वर्तुळात चर्चेला उधाण आले आहे. या मुद्द्यावरून सहकार मंत्र्यांच्या समर्थकांनी सोशल मीडियावर आक्रमक भूमिका घेतल्याने बॅनरवरील फोटोचा विषय आता राजकीय वादाचे कारण ठरत आहे.
‘वेळ बदलली म्हणून इतिहास बदलत नाही!’ या आशयाच्या पोस्ट सोशल मीडियावर मोठ्या प्रमाणात फिरत आहेत. या पोस्टमधून आमदार संजय बनसोडे यांच्या जुन्या राजकीय प्रवासाचा संदर्भ देत, त्यांच्या राजकीय वाटचालीत ज्यांनी साथ दिली, मदत केली आणि विश्वास दाखवला, त्यांची आजच्या राजकीय परिस्थितीत आठवण ठेवली जात आहे का, असा अप्रत्यक्ष सवाल उपस्थित करण्यात आला आहे.
‘पद मोठे झाले म्हणून कालच्या संघर्षातील माणसे विसरता येत नाहीत’, ‘कठीण काळात साथ देणाऱ्यांची किंमत पद मिळाल्यानंतरही कायम राहायला हवी’, तसेच ‘उपकार विसरले म्हणून उपकार करणारे विसरत नाहीत’, अशा आशयाच्या पोस्टमधून नाराजी व्यक्त करण्यात आली आहे. त्यामुळे एका बॅनरवरील फोटोच्या अनुपस्थितीला जुन्या राजकीय संबंधांच्या संदर्भाची किनार मिळाली आहे.
एखाद्या बॅनरवर कोणाचा फोटो असावा किंवा नसावा, हा आयोजकांचा निर्णय असतो. मात्र, संबंधित नेत्यांमध्ये पूर्वी राजकीय जवळीक आणि परस्पर सहकार्याची चर्चा होत असल्याच्या पार्श्वभूमीवर फोटो नसल्याने समर्थकांकडून त्याचे विविध राजकीय अर्थ काढले जात आहेत.
या पोस्टमुळे ‘राजकीय समीकरणे बदलली आहेत का?’, ‘जुनी राजकीय जवळीक आता केवळ इतिहास ठरली आहे का?’ आणि ‘या वादाचा आगामी राजकारणावर परिणाम होणार का?’ यासारखे प्रश्न उपस्थित होत आहेत.
विशेष म्हणजे, केवळ एका बॅनरवरील फोटोच्या अनुपस्थितीवरून सोशल मीडियावर तीव्र प्रतिक्रिया उमटल्याने हा विषय चर्चेचा केंद्रबिंदू बनला आहे. दोन्ही बाजूंच्या समर्थकांकडून सुरू असलेल्या पोस्ट आणि प्रतिक्रियांमुळे राजकीय वातावरण तापले आहे.
दरम्यान, संबंधित नेते या प्रकारावर काय भूमिका मांडतात, समर्थकांचा सोशल मीडिया वाद पुढे किती वाढतो आणि दोन्ही बाजूंमध्ये पुन्हा संवादाची शक्यता निर्माण होते का, याकडे राजकीय वर्तुळाचे लक्ष लागले आहे.
‘इतिहास विसरला म्हणून इतिहास बदलत नाही... आणि उपकार विसरले म्हणून उपकार करणारेही विसरत नाहीत!’ या आशयाच्या पोस्टमुळे सध्या सोशल मीडियावर चर्चा रंगली असून, एका बॅनरवरील फोटोने दोन राजकीय गटांमधील संबंधांबाबत नव्या चर्चेला तोंड फोडले आहे.
‘वेळ बदलली म्हणून इतिहास बदलत नाही’, असे म्हणत जुन्या राजकीय उपकारांची आठवण करून देणाऱ्या सहकार मंत्र्यांच्या समर्थकांच्या पोस्टला आमदार संजय बनसोडे यांच्या कार्यकर्त्यांनी सोशल मीडियावरून प्रत्युत्तर दिले आहे. ‘आय सपोर्ट संजय बनसोडे’ अशा आशयाच्या पोस्ट समाजमाध्यमांवर सुरू झाल्या आहेत. त्यामुळे सहकार मंत्री बाबासाहेब पाटील आणि माजी मंत्री तथा आमदार संजय बनसोडे यांच्या समर्थकांमधील सोशल मीडिया वाद चांगलाच रंगला आहे. या वादावर पडदा कोण आणि कसा टाकणार, याचीच चर्चा आता राजकीय वर्तुळात सुरू आहे.