मदनसुरी-धानोरा रस्त्याची चाळण; लोकप्रतिनिधींचे दुर्लक्ष

Poor condition of Madansuri-Dhanora road; elected representatives are neglecting the issue

निलंगा, पुढारी वृत्तसेवा : तालुक्यातील मदनसुरी धानोरा रस्त्याची अत्यंत वाईट अवस्था झाली असून वर्षानुवर्षे हे दोन्ही रस्ते दुर्लक्षित राहिले आहेत. परिणामी अनेक अपघात होत आहेत. या भागातील लोकप्रतिनिधीचे दुर्लक्ष होत आहे, त्यामुळे रस्त्यात खड़े की, खड्यात रस्ता अशी अवस्था झाली असून तात्काळ रस्ता दुरुस्ती करण्याची मागणी होत आहे.

निलंगा तालुक्यातील मदनसुरी ते लिंबाळा जाणारा तीन ते चार किलोमीटर चा रस्ता व धानोरा ते मदनसुरी जाणाऱ्या जवळपास साडे चार किलोमीटर च्या रस्त्यावर मोठमोठे खड्डे पडले आहेत. या रस्त्यावर अनेक अपघात होत आहेत. तसेच कासार सिरसी ते मदनसुरी व निलंगा ते मदनसुरी व निलंगा तर धानोरा मदनसुरी जाणाऱ्या या मुख्य रस्त्यावर खड्डे पडले असून वाहनधारकांना याचा नाहक त्रास सहन करावा लागत आहे. संबंधित रस्त्यावरून चार ते पाच गार्वाना जोडणाऱ्या या रस्त्याची चाळण झाली असून मोठ-मोठे खड़े पडले आहेत.

या मार्गावर परिवहन महामंडळाच्या बस धावतात. त्यांनाही याचा त्रास सहन करावा लागत आहे. निलंगा ते धानोरा, मदनसुरी परिसरातील नागरिकांसाठी माल वाहतूक किंवा शहराच्या ठिकाणी जाण्या-येण्यासाठी हा रस्ता महत्त्वाचा आहे.

मदनसुरी येथे प्राथमिक आरोग्य केंद्र असून रामतीर्थ, कोकळगाव, कांबलेवाडी, नदीहत्तरगा, सरवडी, हाडोळी, हणमंतवाडीसह अनेक गावचे रुग्ण रुग्णवाहिकेद्वारे व खासगी वाहनाने आरोग्यकेंद्रात येतात. मात्र, रस्ता खराब असल्याने व रस्त्यावर आलेल्या झाडाझुडपामुळे रुग्णांना, नागरिकांना त्रास सहन करावा लागत आहे.